Markaziy proyeksiyalash. Biror narsaning tekislikdagi proyeksiyasini hosil qilish uchun o‘sha narsaning o‘zi, tasvir (proyeksiya) tushirish uchun tekislik va yoritgich manbayi bo‘lishi kerak. 13.1-chizma, a da ana shular mavjud bo‘lib, tasvir hosil qilish uchun stoldagi qutining burchaklari orqali chiroq nuri o‘tkaziladi. Chiroq nurlari stol tekisligi bilan kesishib, qutidan tushayotgan soyaning konturini hosil qiladi. Bu yerda: narsa – quti, tekislik – stol sathi, yoritgich manbayi – chiroq, qutidan tushayotgan soya – tasvir (proyeksiya) hisoblanadi.
Endi qutini ABC uchburchaklik shakli bilan, stol sathini H tekisligi bilan, chiroqni S nuqta bilan almashtirib, S nuqta orqali uchburchakning ABC nuqtalari orqali o‘tuvchi yordamchi chiziqlar o‘tkazilsa, H tekislik bilan kesishib, ABC ning proyeksiyasini hosil qiladi (13.1-chizma, b).
Bu yerda S proyeksiyalash markazi, ABC narsa, AB C proyeksiya, H
proyeksiya tekisligi, SA, SB , SC proyeksiyalash nurlari deyiladi. Proyek- siyalashning bu ko‘rinishi markaziy proyeksiyalash deyiladi.
Chizmachilikda narsaning nuqtalarini lotin alfavitining bosh harfi, uning proyeksiyasini o‘sha harfga shtrix belgisi qo‘yib yoziladi.
Parallel proyeksiyalash. Yoritgich manbayi sifatida Quyosh yoki Oy olinsa, parallel proyeksiyalash hosil qilish mumkin. Chunki yoritgich mar- kazi bu yerda cheksizlikda bo‘lib, Quyosh va Oydan kelayotgan yoritish nurlari o‘zaro parallel deb qabul qilinadi.
Parallel proyeksiyalash, o‘z navbatida, ikki xil ko‘rinishda: qiyshiq burchakli va to‘g‘ri burchakli bo‘ladi.
Proyeksiyalash nuri s proyeksiyalar tekisligi H ga nisbatan o‘tkir burchak ostida berilgan bo‘lsa, unga parallel qilib shaklning ABC nuqtalaridan yordamchi proyeksiyalovchi nurlar o‘tkaziladi. Natijada bu nurlar H bilan kesishib, ABC ning proyeksiyasi AB C qiyshiq burchakli proyeksiyasini hosil qiladi (13.2-chizma, a).
Agar proyeksiyalash nuri s proyeksiyalar tekisligi H ga nisbatan perpendikular, ya’ni to‘g‘ri burchakda berilgan bo‘lsa, to‘g‘ri burchakli proyeksiyalash hosil bo‘ladi (13.2-chizma, b). Bu yerda ABC – narsa, s – proyeksiyalash yo‘nalishi, H – proyeksiyalar tekisligi, ABC – narsaning H dagi proyeksiyasi, AA, BB , CC – proyeksiyalash nurlari deyiladi.
To‘g‘ri burchakli parallel proyeksiyalashni ortogonal (yunoncha orto – to‘g‘ri, gonal – burchak, ya’ni to‘g‘ri burchakli) proyeksiyalash ham deyi- ladi. Endi markaziy va parallel (qiyshiq va to‘g‘ri burchakli) proyeksiyalarni o‘zaro taqqoslab ko‘ramiz. Markaziy proyeksiyada narsaning proyeksiyasi o‘zidan katta. Demak, bu proyeksiyada detalning chizmasi orqali uning haqiqiy kattaligi to‘g‘risida fikr yuritish qiyin. Qiyshiq burchakli parallel proyeksiya olinsa, bu yerda narsaning burchaklari buzilib proyeksiyalanadi. Bunday proyeksiyalashda ham detalning haqiqiy ko‘rinishi chizmada to‘g‘ri tasvirlanmaydi.
To‘g‘ri burchakli parallel proyeksiyada narsa va uning proyeksiyasi bir- biriga teng. Demak, bunday proyeksiyalash turida bajarilgan detal chizmasiga qarab uning konstruksiyasi, ya’ni tuzilishi to‘g‘risida to‘liq ma’lumot olish mumkin. Bunday chizma to‘g‘risidagi ma’lumot 13.3-chizmada keltirilgan. Bundan keyin proyeksiyalashning bu turiga, ya’ni to‘g‘ri burchakli parallel proyeksiyalashga asoslanib chizmalar chizamiz. Chunki har qanday chizmalar to‘g‘ri burchakli parallel proyeksiyaga asoslanib chiziladi. To‘g‘ri burchakli parallel proyeksiyalash o‘rniga qisqacha proyeksiyalash deyiladi. Shunda to‘g‘ri burchakli parallel proyeksiyalash tushuniladi.
Qanday proyeksiyalash turlari mavjud?
Markaziy proyeksiya va parallel proyeksiya deb nimaga aytiladi?
Proyeksiyaning o‘zi nima?
Chizmachilik daftaringizga pro- yeksiyalash turlarini chizib, bi- limingizni mustahkamlang.
Proyeksiyalovchi nurlar bitta markazdan chiqsa, qanday pro- yeksiyalash usuli deyiladi?
|
