Jihozlarni o`rnatish, sozlash va ta`mirlashda

Qurilayotgan korxonalarda yong’in xavfsizligi qoidalariga rioya qilish, yong’in xavfsizlik tadbirlarini o`tkazish va yong’inni o`chirish vositalarini ishchi holatda saqlash uchun qurilish boshlig’i shaxsan javobgar hisoblanadi, alohida qurilish uchastkalarida – bu javobgarlik prorab va masterga yuklanadi.

Ishlab turgan oziq ovqat korxonasini rekonstruktsiya qilish, kengaytirish va texnik qayta jihozlash vaqtida yong’in xavfsizligi qoidalariga amal qilishning vaqtinchalik instruktsiyasi tuziladi. Bunda montaj, sozlash va ta`mirlash ishlari olib boriladigan uchastka, tsex boshqa ishlab chiqarish tsexlarida yonmaydigan yoki qiyin yonadigan to`siqlar yordamida ajratiladi. Ushbu ob`ektlar uchun yong’in xavfsizligi bo`yicha mas`ul shaxs ishlab chiqarish va qurilish-montaj korxonalari rahbarlarining qo`shma buyrug’i asosida aniqlanadi. Yong’inga qarshi suv ta`minoti, yo`laklar, yo`llar va aloqa vositalari mavjud bo`lmaganda qurilish-montaj ishlarini bajarishga ruxsat berilmaydi.

Ob`ektning yong’inga qarshi holati bo`yicha mansabdor shaxslar yong’in xavfsizligi qoyidalarini aniq bilishlari va uni bajarishlari, ushbu qoidalarga rioya qilish ustidan nazorat o`rnatishlari, o`rnatilgan normalar bo`yicha yong’in o`chirish vositalarining ishchi holda va doimo tayyor bo`lishi, qurilayotgan binolarning yong’inga qarshi holatini tekshirishlari, yong’in sodir bo`lganda yong’inni o`chirish qismiga darhol xabar berishlari va zudlik bilan yong’inni o`chirish choralarini ko`rishlari shart.

Qurilayotgan ob`ektdagi barcha ishchi va xizmatchilar 12 soatlik dastur asosida yong’inga qarshi kursdan va instruktajdan o`tkaziladilar. Instruktaj o`tkazish jarayonida yong’in xavfsizligi qoidalari va yong’inga qarshi rejimlar bilan tanishtiriladi. Bunda asosiy e`tibor yong’in sabablari, yong’inni o`chirish vositalarini qo`llash qoidalari va usullariga qaratiladi.

Payvandlash va olov ishtirokida bajariladigan barcha ishlar yong’in xavfsizligi qoidalariga (ППБ-05.86), СНиП III-4-80 va DSt 12.3.036-84 “Metallarning gaz-alangali qayta ishlash. Xavfsizlik qoidalari”ga qat`iy rioya qilgan holda amalga oshirilishi shart. Olov ishtirokida bajariladigan ishlarga qurilish tashkiloti rahbari yoki bosh muhandis ruxsat beradi. Payvandlash va olovli ishlarni bajarish uchun yong’inga qarshi texnik minimumni o`tgan va ushbu ishlarni bajarish uchun maxsus malaka guvohnomasi bo`lgan mutaxassislarga ruxsat beriladi.

Payvandlash va olovli ishlarga yong’in xavfsiligi bo`yicha barcha talablarni (yong’in o`chirish vositalari mavjudligi, ish joyini yonuvchi materiallardan tozalanganligi, yonuvchi konstruktsiyalarni metall ekranlar yoki listlar bilan himoyalanganligi, uchqun uchishi va uning yonuvchi konstruktsiyalarga tushishi oldini oluvchi choralar ko`rilganligi va h.k.) bajargandan keyin ruxsat beriladi. Balandlikda ish bajarayotgan payvandchi o`zi bilan elektrod qoldiklarini solish uchun metall quti olishi shart.

Shamol kuchi 6 balldan oshganda balandlikda gaz-elektr payvandlash ishlarini bajarish taqiqlanadi.

Payvandlash ishlarini yonuvchi va qiyin yonuvchi moddalarni qo`llab amalga oshiriladigan ishlar bilan bir vaqtda bajarish taqiqlanadi.

Yong’in xavfi yuqori bo`lgan joylarda hamda katta hajmdagi payvandalsh ishlarini bajarganda yong’inga qarshi postlar tuziladi. Bu postlarning asosiy vazifasi payvandlash ishlari tugagandan keyin ish joylarini e`tibor bilan tekshirish, quyi qavatlar va maydonchalarda yashirin yong’in o`choqlarini aniqlash, yonuvchi konstruktsiyalarga suv sepish, zarur bo`lganda qo`shimcha postlar tashkil qilishdan iboratdir.

Postlarning kun jadvali, odamlarni yong’in chiqqanda evakuatsiyalash sxemasi tayyorlanib ko`zga ko`rinarli joylarga osib qo`yiladi.