176
Tayar ónimniń quramına kiriwshi materiallardıń,
islew berilgen
materiallardıń ulıwma kólemine qatnası túrinde esaplanadı.
Menshiklestiriw – mámleket múlkin basqa múlikshilik
formalarına, atap aytqanda, kollektivlik, akcionerlik hám jeke múlikke
aylandırıwda, múlikshilik qatnasıqlardıń ózgeriw procesi.
Miynet ónimdarlıǵı – insanlardıń óndirislik háreketiniń
nátiyjeliligi; jumısshınıń materiyallıq óndiris tarawında jumıs waqtı
birliginde jetistirgen ónimlerdiń muǵdarı yamasa ónim birligin
jetistiriw ushın jumsalǵan waqıt penen ólshenedi. Miynettiń jámiyetlik
ónimdarlıǵı, jetistirilgen milliy dáramattıń materiyallıq óndiris
tarmaqlarında bánt bolǵan hár bir xızmetkerge salıstırılıp esaplanadı.
Miynet shártnaması – isbilermen hám jumısqa alınıwshı
ortasındaǵı kelisim, ol boyınsha xızmetkerdiń jumıs islew wazıypası,
jumıs ornı, lawazımı, aylıq is haqısı, jumıstı baslaw waqtı hám taǵı
basqalar belgilep alınadı.
Óndirislik quwatlılıq – tiykarǵı óndirislik hám aylanıs fondları,
sonday-aq, finanslıq resurslardan múmkin bolǵanınsha tolıq hám
aqılǵa muwapıq paydalanǵan túrde jetistiriw múmkin bolǵan
ónimlerdiń maksimal kólemi.
Óndirislik struktura – kárxananıń ónim
jetistiriw procesinde
tikkeley qatnasatuǵın, óndirislik bólimler - cexlar, uchastkalar, xızmet
kórsetiwshi xojalıq baylanıslarınıń jıyındısı.
Óndiristi koncentraciyalaw – ónimdi iri kárxanalarda
jetistiriwdi shólkemlestiriw.
Óndiristi qánigelestiriw - iri kárxanalarda texnologiyası hám
strukturası birdey bolǵan ónimlerdi massalıq túrde jetistiriw.
Óndiristi ximiyalastiriw – ónim jetistiriwde ximiyalıq ónim hám
jasalma materiallar, sonday-aq, ximiyalıq usıllardan keń paydalanıw.
