1-mavzu: Umumiy qoidalar. Asosiy tushuncha va atamalar. Haydovchilarning majburiyatlari. Yth sodir etgan haydovchilarning vazifalari (4 soat)

1-mavzu: Umumiy qoidalar. Asosiy tushuncha va atamalar. Haydovchilarning majburiyatlari. YTH sodir etgan haydovchilarning vazifalari (4 soat).

• Tayanch iboralar: qoidalar, asosiy tushunchalar, atamalar, avtomagistral, ajratuvchi bo’lak, arava, asosiy yo’l, velosiped, yetarli ko’rinmaslik, imtiyoz, yo’l, yo’lovchi, yo’l-transport hodisasi, yo’l harakati, yo’l harakatini tashkil etish, yo’l harakati xavfsizligi, yo’l harakati qatnashchisi, mexanik transport vositasi, piyoda, piyodalar yo’lkasi, reversiv harakat, tartibga soluvchi, temir yo’l kesishmasi, transport vositasi, haydovchilarning vazifalari, haydovchilarning majburiyatlari, haydovchilarga taqiqlangan shartlar, YTH sodir etgan haydovchilarning vazifalari.

• Reja:
• Umumiy qoidalar.
• Qoidalarda qo’llanilgan asosiy tushunchalar.
• Qoidalarda qo’llanilgan asosiy atamalar.
• Mexanik transport vositasi haydovchisining vazifalari.
• Haydovchilik guvohnomasiga ega bo’lgan shaxs majburiyati.
• Mototsikl haydovchisining majburiyati.
• Xalqaro yo’llarda harakatlanish.
• Transport vositasi haydovchisining majburiyatlari.
• Haydovchiga taqiqlangan harakatlar.
• Yo’l-transport hodisasi sodir etgan haydovchilarning vazifalari.

• Komp’yuterda sahifalovchi TAYI, “HXTE” kafedrasi magistranti S.Z.Azizov

UMUMIY QOIDALAR

• 1. Ushbu yo’l harakati qoidalari (keyingi o’rinlarda Qoidalar deb ataladi) respublika hududidagi yo’llarda harakatlanishning yagona tartibini belgilaydi.
• 2. O’zbekiston Respublikasi yo’llarida transport vositalarining o’ng taraflama harakatlanish tartibi belgilangan.
• 3. Yo’l harakati qatnashchilari O’zbekiston Respublikasining «Yo’l harakati xavfsizligi to’g’risida»gi qonunini, ushbu Qoidalarni, svetofor ishoralari, yo’l belgilari, qatnov qismidagi chiziqlarning o’zlariga tegishli bo’lgan talablarini bilishlari, ularga amal qilishlari, shuningdek, o’zlariga berilgan huquq doirasida yo’llarda harakatni boshqarayotgan tartibga soluvchilarning ko’rsatmalarini so’zsiz bajarishlari shart.
• 4. Yo’l harakati qatnashchilari harakatlanish vaqtida boshqa qatnashchilarning harakatlanishiga xavf tug’dirmasliklari kerak. Vakolati bo’lmagan jismoniy va yuridik shaxslarning yo’l qoplamasini buzishi yoki ifloslantirishi, yo’l belgilarini, svetoforlar va harakatlanishni tashkil etishning boshqa texnik vositalarini o’zboshimchalik bilan olib tashlash, o’rnatish, to’sib qo’yish, shikastlantirish, yo’llarda harakatlanishga to’sqinlik qiluvchi narsalarni qoldirishlari taqiqlanadi. Harakatga to’sqinlik tug’dirgan shaxs uni tezda bartaraf qilish uchun imkoniyati darajasida barcha choralarni ko’rishi, agar buning iloji bo’lmasa, o’zida bo’lgan barcha vositalar bilan xavf-xatar haqida harakat qatnashchilarini ogohlantirishi va militsiyaga xabar berishi shart.
• 5. Mazkur Qoidalarni buzgan shaxslar O’zbekiston Respublikasining amaldagi qonun hujjatlariga binoan javobgarlikka tortiladilar.