3-Ma’ruza
Mavzu: Tolalarni tarashga tayyorlash.
Reja
1. Tolali mahsulotlarga ishlov beruvchi uskunalarning texnologik tizimlari.
2. Titish jarayonining maqsadi va mohiyati
3. Paxta tоlasini tоzalash jarayonining maqsadi va mоhiyati.
4. Avtotoytitgichlar.
5. Tоzalash
mashinalarini tuzilishi, ishlashini o’ziga xоsligi. .
Tolali mahsulotlarni titib tozalovchi universal
texnologik tizimlar
Yigirish rejasining birinchi bosqichida toylangan tolalardan titish, tozalash va
aralashtirish jarayonlari orqali tarash mashinalari uchun bir tekis
qatlam shaklidagi mahsulot
tayyorlanadi. Bu vazifa bir texnologik tizimga biriktirilgan mashinalarda (TTA) - titish-tozalash
agregatlarida amalga oshiriladi. TTAlarining tarkibi ishlatilayotgan tolalarning ifloslik
darajasiga, uzunligiga, yigirilayotgan ip assortimentiga qarab tanlanadi (loyihalanadi yoki qabul
qilinadi). Yigirish texnologiyasining taraqqiyoti davomida TTAlar MHD miqyosida tozalash
samaradorligiga ko‘ra ajratib kelindi (tozalash darajasi past - 24%, tozalash darajasi yuqori 50-
55% va tozalash darajasi juda yuqori - 70%). Ushbu TTAlarda texnologik jarayon kuchli zarbiy
ta’sirlar vositasida amalga oshirilganligi tufayli tolalar shikastlanishi yuqori darajada bo‘lgan.
Fan texnikaning rivojlanishi, yigirishda avtomatlashtirilgan tizimlarning joriy qilinishi mahsulot
sifatiga talabning oshishi TTA
tarkibini samarali ishlaydigan, ixcham va tejamkor mashinalar
bilan tez-tez o‘zgarishini taqozo etmoqda.
Dunyo mamlakatlarining to‘qimachilik korxonalarida ishlatilayotgan TTA turlari xilma
xil bo‘lib, ularni umumlashtirgan holda quyidagi tarkibga keltirish mumkin:
Universal titib tozalash agregati (UTTA)
1. Avtotoy titgich.
2. Qaytim tola titgich.
3. Dastlabki tozalash mashinasi.
4. Aralashtiruvchi mashina.
5. Asosiy tozalash mashinasi.
6. Aerodinamik tozalash mashinasi.
7. Tola taqsimlash tizimi.
UTTAda tozalash jarayoni uch bosqichda amalga oshirilishi
natijasida tolali mahsulotni
shikastlanishi va uzun tolalarni nuqsonlarga qo‘shilib chiqib ketishi sezilarli darajada
kamaytirilgan.
Agregatning tarkibi, garnituralar,
ishchi organlar soni, tolali mahsulotdagi chiqindilar
miqdoriga va yigirilayotgan ip assortimentiga qarab o‘zgartirilishi mumkin. Agregat mashinalari
pnevmotrubalar yordamida o‘zaro biriktirilgan. Pnevmotrubalar asosiy va yordamchi holatda
o‘rnatilgan bo‘lib, tizimdagi mashinani texnologik jarayondan chiqarib qo‘yish imkonini beradi.
Asosiy tozalashdan so‘ng aerodinamik tozalagichlarning ishlatilishi
tolalarni nafaqat
shikastlanishi balki chigallanishini ham kamaytiradi.
UTTA mashinalarining parametrlari kompyuter yordamida boshqariladi va shaylanadi.
Agregat odatda chiqindilarni ajratib oluvchi va changsizlantiruvchi sistema bilan birgalikda
ishlatiladi.
Rieter firmasining universal titish-tozalash
agregati
1. Avtomatik toy titgich Unifloc A-11
2. Dastlabki tozalash mashinasi Uniclean B-11
3. Aralashtiruvchi mashina UnimixB-70
4. Bir barabanli tozalagich Uniflex B-60
Ushbu agregat universal va samarali hisoblanib
turlicha xom ashyolarda, har xil
assortimentdagi (halqali, pnevmomexaniq va qayta tarash) iplar tayyorlashda qo‘llanilmoqda.
Tozalash mashinalari bir barabanli ishchi organlar bilan jihozlangan bo‘lib, dag‘al nuqsonlar
maydalanmasdan ajratilishi ko‘zda tutilgan. «Truetzschler» firmasining
titish tozalash agregati
«modul» qurilma hisoblanadi va ishlatish maqsadiga ko‘ra quyidagi turlarga ajratilishi mumkin.
qisqa titish-tozalash agregati
uzun tolalarni titish-tozalash agregati
universal titish-tozalash agregati
kimyoviy tolalarni titish-tozalash agregati
unumdorligi yuqori titish-tozalash agregati
