Dasturlash muhiti. Scratch muhitida takrorlanuvchi bloklar bilan ishlash

1. 
   Scratch dasturlash muhiti.
   
2. 
   Scratch muhitida takrorlanuvchi bloklar bilan ishlash.
   
3. 
   Scratch muhitida dasturlash mavzusini o’qitish metodikasi.
   
4. 
   Scratch dasturi bo’yicha o’qitish uslubiyatlari.
   

Kirish.
Hozirgi jadal rivojlanish va turli jarayonlarni avtomatlashtirish hamda robotlashtirish davrida dasturlashni bilish va uni o'z ish jarayonida ishlata olish texnik va pedagogik yo'nalishda ta’lim olayotgan o’quvchi-talabalar uchun juda muhim deb hisoblanadi. Bu zamonaviy mutahassilar uchun eng zaruriy talablardan biridir, desak ham bo’ladi, chunki hozirgi kunda informatika turli-tuman sohalarda muvaffaqiyatli ravishda qo’llanilishi mumkinligini hech kim ham rad eta olmaydi. So’nggi davrlarda butun dunyo miqyosida ko’pchilik texnologiyalar raqamli shaklga o’tib bormoqda. Shuning uchun ham hayotimizni zamonaviy axborot texnologiyalarisiz tasavvur qilish ancha qiyin bo’lib qoldi. Internet texnologiyasi, har xil ko’rinishdagi aqlli elektron qurilmalar (shaxsiy kompyuterlar, smartfonlar, noutbuklar, planshetlar va boshqalar) hayotimizning ajralmas bo’lagiga allaqachon aylanib ulgurdi. Bularsiz hozirgi kundagi hayotimizni tasavvur qilish ancha murakkab bo’lib qoldi. Bilamizki, ushbu elektron-raqamli qurilmalar ikki qismdan tashkil topgan. Birinchi qism qurilmalarning texnik ta’minoti, misol uchun shaxsiy kompyuterdagi monitor, klaviatura, sichqoncha, tizimli blok, qattiq disk, operativ hotira va boshqalar. Ikkinchi qism esa dasturiy ta’minot, ya’ni, elektron qurilmaning ishlashi va undan foydalanish uchun kerak bo’ladigan dasturlar hisoblanadi. Shuning uchun ham eng avvalo dasturiy ta’minotni kengroq yoritishga harakat qilamiz. Foydalanuvchi va kompyuter o’rtasidagi muloqotni ta’minlovchi operatsion tizim, kompyuterning ichki va tashqi qurilmalari o’rtasidagi bog’lanshni amalga oshiradigan drayver dasturlari, kompyuter imkoniyatlarini oshiruvchi va foydalanuvchining kompyuterdan foydalanishini osonlashtiruvchi yordamchi utilita dasturlari, kompyuterda ma’lum bir vazifani bajarishga mo’ljallangan amaliy dasturlar kompyuterning dasturiy ta’minotini tashkil qiladi. Bundan tashqari, hozirgi kunda keng qo’llanilayotgan Internet texnologiyasiga asoslangan ijtimoiy tarmoqlar va messenjerlar ham komp’yuterning dasturiy ta’minotini tashkil qiladi.