| BMT-nin ərzaq və kənd təsərrüfatı təşkilatı (FAO). Bu təşkilat 1945- ci ildə BMT-nin dövlətlərarası ixtisaslaşdırılmış təşkilatı kimi yaradılmışdır. Onun üzvləri 160-a yaxın dövlətlərdir. Təşkilatın Nizamnaməsinə görə onun məqsədi xalqların həyat səviyyəsinin yüksəldilməsi, istehsalatın səmərəliliyinin artırılması, kənd əhalisinin həyat şəraitinin yaxşılaşdırılması üçün ölkələrin birgə hərəkətini təmin etməkdən ibarətdir. Bu da bütövlükdə dünya iqtisadiyyatının inkişafına kömək etməlidir.
Standartlaşdırma FAO-nun birbaşa vəzifəsi olmadığına baxmayaraq onun bir çox struktur bölmələri standartlaşdırma ilə sıx əlaqəlidir. Məsələn, irriqasiya, drenaj, kənd yerlərinin su ilə təchizatı problemləri ilə məşğul olan torpaq və suyun inkişafı şöbəsi; kənd təsərrüfatı texnikası şöbəsi (kənd təsərrüfatının mexanikləşdirilməsi, kənd tikintisi ilə məşğul olur); bitkilərin becərilməsi və mühafızəsi şöbəsi; heyvandarlıq məhsulları şöbəsi; meşə ehtiyatları şöbəsi; meşə sənayesi və ticarət şöbəsi; atom enerjisinin yeyinti sənayesində və kənd təsərrüfatında istifadəsi üzrə şöbə; balıq ehtiyatları şöbəsi.
|
