|
O‘zbekistonda raqamli jamiyatni rivojlantirishga dadil qadam tashlandi
|
| bet | 2/2 | | Sana | 22.12.2023 | | Hajmi | 20,9 Kb. | | #126754 |
Bog'liq Raqamli jamiyatning umumiy asoslari 1 мавзу менежментнинг назарий асослари — копия, Bonu 27-variantpdf, iq uz, Matematika, Дисс 1 BOB, Elektrotexnika va elektronika asoslari (M.Turdiyev), ERGASHEV SAIDJON, Фермер хўжаликларини самарали бошқариш Aliqulova MD uz, lecture 2 alfra, lecture 3, lecture 24, lecture 24, 1-mavzu Buxgalteriya,Iqtisodiyot ,Bank, 2 (1)O‘zbekistonda raqamli jamiyatni rivojlantirishga dadil qadam tashlandi
Respublikamizning asosiy ustuvor yo‘nalishlaridan biri aloqa, axborotlashtirish va telekommunikatsiya texnologiyalarini rivojlantirishdir.
O‘zbekiston Respublikasi Prezidentining 2020-yil 5-oktyabrdagi PF-6079-son farmoni bilan «Raqamli O‘zbekiston — 2030» strategiyasi qabul qilinib, uni samarali amalga oshirish chora-tadbirlari belgilangani buning tasdig‘idir.
Strategiyaning asosiy maqsadi – respublikada raqamli sanoatni jadal rivojlantirish, milliy iqtisodiyotning raqobatbardoshligini oshirish, shuningdek, telekommunikatsiya texnologiyalari, tarmoqlari va aloqa infratuzilmasini rivojlantirish, statsionar va mobil aloqalarni kengaytirish bo‘yicha vazifalar ijrosini ta’minlash, keng polosali ulanish, magistral telekommunikatsiya tarmoqlarini modernizatsiya qilish va kengaytirish, multimedia xizmatlarini rivojlantirish uchun zarur infratuzilmani yaratish, «Elektron hukumat»ning axborot tizimlari va ma’lumotlar bazalarini takomillashtirish, davlat xizmatlari ko‘rsatish sifati va samaradorligini oshirish, jamoatchilik nazorati mexanizmlarini amalda tatbiq etish, fuqarolik jamiyati institutlari va ommaviy axborot vositalarining rolini kuchaytirishdan iborat.
Mazkur Strategiya doirasida turli tarmoq va sohalarda, birinchi navbatda, davlat boshqaruvi, ta’lim, sog‘liqni saqlash va qishloq xo‘jaligida kompleks chora-tadbirlar amalga oshirildi.
Quyida Strategiya doirasida amalga oshirilgan chora-tadbirlardan ayrimlarini misol keltiramiz.
Jumladan, Navoiy kon-metallurgiya kombinatida ishlab chiqarish jarayonlarini masofadan turib boshqarish imkonini beruvchi avtomatik boshqaruv tizimi, ta’lim sohasida «Oliy ta’lim jarayonini boshqarish» axborot tizimi joriy etildi. Bu – ta’lim, ilmiy va moliyaviy jarayonlar hamda talabalarning yagona elektron ma’lumotlar bazasini shakllantirish, oliy ta’lim muassasasini tamomlaganlik to‘g‘risidagi diplom berish tizimini joriy etish imkonini beradi.
Bundan tashqari, fuqarolarni raqamli identifikatsiyalashning yagona tizimini joriy etish, iqtisodiyotning turli tarmoqlarida innovatsion texnologiyalarni keng joriy etish, aholini ijtimoiy ta’minlash va muhofaza qilish, turli davlat hisobiga olish tizimlari o‘rtasida axborot hamkorligi uchun jismoniy shaxslar to‘g‘risidagi birlamchi ma’lumotlardan samarali foydalanish maqsadida 2021-yil 1-yanvardan boshlab O‘zbekiston Respublikasida identifikatsiya ID-kartalari joriy qilindi. Bugungi kunga qadar O‘zbekiston Respublikasining 890 mingdan ortiq fuqarosi ushbu xizmatdan foydalangan. ID-kartalarning joriy etilishi diplom, nikoh guvohnomasi, harbiy guvohnoma, haydovchilik guvohnomasi va boshqalarni tasdiqlovchi hujjatlarni talab qilish amaliyotidan voz kechish imkonini berdi.
Albatta, yuqoridagi loyihalarni muvaffaqiyatli yo‘lga qo‘yishni kardinal raqamli transformatsiyasiz amalga oshirib bo‘lmas edi. Bunda esa «elektron hukumat» asosiy o‘rinni egallab, elektron davlat xizmatlarini shaffof rivojlantirish, elektron ishtirok va hamkorlikni kengaytirish, aholiga xizmatlar ko‘rsatishda raqamli salohiyatni kuchaytirish imkonini beruvchi platforma vazifasini o‘taydi.
Xususan, «Elektron hukumat» tizimining idoralararo integratsiya platformasi orqali ma’lumotlarni uzatish dinamikasi shuni ko‘rsatadiki, agar 2018-yilda davlat organlari va idoralarining axborot almashinuvi ko‘rsatkichi 25 millionni tashkil etgan bo‘lsa, 2021-yil yakuniga ko‘ra bu ko‘rsatkich 1,4 mlrd.dan oshadi.
Yuqoridagi ko‘rsatkichlarga 23 ta davlat organining 120 ta axborot tizimidagi 146 ta xizmatning integratsiyalashuvi natijasida erishildi va bu aholi hamda tadbirkorlik sub’ektlari tomonidan davlat xizmatlaridan foydalanishda vaqt va kutishlarni qisqartirish imkonini berdi.
Idoralararo integratsiya platformasiga ma’lumotlar olish xizmatlarining integratsiyalashgani tufayli ko‘rsatilayotgan davlat xizmatlari soni 300 tagacha ko‘paydi: shundan 185 tasi bepul bo‘lib, 181 tasi ERI tasdig‘ini talab qilmaydi, 217 tasi bevosita tadbirkorlik sub’ektlari uchun mo‘ljallangan.
Elektron shaklda davlat xizmatlari ko‘rsatishning ko‘payishi yiliga 16,8 milliard so‘m byudjet mablag‘larini tejash imkonini berdi.
O‘zbekiston Respublikasida amalga oshirilayotgan barcha islohotlar, zamonaviy iqtisodiyotning eng istiqbolli tarmog‘i bo‘lgan axborot-kommunikatsiya texnologiyalarining keng joriy etilayotgani ijtimoiy muammolarni hal etish tizimini joriy etishning debochasi bo‘lmoqda. Va bu jamiyatdagi ijtimoiy muhitni yaxshilash va aholi farovonligini oshirishda o‘z samarasini ko‘rsatmoqda.
Prezidentning 2021-yil 23-martdagi «Aholi va tadbirkorlik sub’ektlariga davlat xizmatlaridan foydalanishda yanada qulay sharoitlar yaratish, bu borada byurokratik to‘siqlarni qisqartirish bo‘yicha qo‘shimcha chora-tadbirlar to‘g‘risida»gi PF-6191-son Farmoni hamda 2021-yil 24-iyuldagi «Davlat xizmatlari ko‘rsatish infratuzilmasini takomillashtirish va aholining davlat xizmatlaridan foydalanish imkoniyatlarini kengaytirish chora-tadbirlari to‘g‘risida»gi PF-6269-son Farmoni qabul qilinishi natijasida davlat xizmatlarini ko‘rsatish va ijtimoiy islohotlarni amalga oshirishda davlat organlari tomonidan fuqarolardan talab qilinadigan ma’lumotnomalar soni qisqardi.
Mazkur me’yoriy-huquqiy hujjatlar tufayli fuqarolardan 30 dan ortiq turli ma’lumotnomalarni talab qilish bekor bo‘ldi.
Yuqoridagilar bilan bir qatorda, fuqarolarning interaktiv davlat xizmatlari portalidan oson foydalanishi uchun ishlab chiqilgan mobil ilovani ham alohida ta’kidlash joiz. Ushbu ilova qulay, intuitiv interfeysga ega va nogironlar uchun moslashtirilgan bo‘lib, aholiga davlat xizmatlari ko‘rsatish qamrovini kengaytirish imkonini beradi.
Ayni paytda mobil ilova yordamida 81 dan ortiq davlat xizmatlaridan, jumladan 19 tasidan ro‘yxatdan o‘tmasdan foydalanish mumkin. Shuningdek, kommunal xizmatlar uchun to‘lovlarni tekshirish imkoni bor.
Bundan tashqari, Strategiyani amalga oshirish doirasida har chorak yakunida davlat va xo‘jalik boshqaruvi organlarining raqamli transformatsiyalar holati reytingi baholanadi. Reytingni shakllantirishda quyidagi ko‘rsatkichlar hisobga olinadi: ochiqlik va elektron ishtirok, elektron davlat xizmatlari soni, axborot xavfsizligi holati va boshqalar.
Bugungi kunda boshlangan islohotlar orqaga qaytmas tus oldi, jamiyat tubdan o‘zgardi, islohotlarning ijobiy natijalari turli jahon reytinglarida aks etishi mamlakatimiz uchun yangi bosqich – raqamli jamiyatni rivojlantirishga qadam qo‘yish imkonini yaratdi. Bunda «Elektron hukumat» fuqarolarning tayanchi va respublikamiz iqtisodiyotining lokomotivi bo‘lib xizmat qiladi.
|
| |
