|
II. O`quvchilar fikrining yo`nalishi bo`yicha induksiya, deduksiya, analogiya metodlari
|
| bet | 30/58 | | Sana | 08.02.2024 | | Hajmi | 279,18 Kb. | | #152926 |
Bog'liq 1-Mavzu Boshlang’ich sinflarda matеmatika o‘qitish mеtodikasi fII. O`quvchilar fikrining yo`nalishi bo`yicha induksiya, deduksiya, analogiya metodlari.
Bu uchta metod yangi bilimlarni egallashning har bir holi asosida yotuvchi xulosalarning xususiyatlariga qarab bir–biridan farq qiladi.
Induksiya metodi bilishning shunday yo`liki, bunda o`qituvchining fikri birlikdan umumiylikka, xususiy xulosalardan umumiy xulosalarga qarab boradi. Bu metoddan foydalanib biror qonuniyatni yechish yoki qoidani chiqarish uchun o`qituvchi misollar, masalalar, ko`rsatmali materiallarni puxtalik bilan tanlaydi.
M: 1 – sinf o`quvchilariga yig`indi bilan qo`shiluvchi orasidagi bog`lanishni tushuntirish uchun o`quvchilarni xulosaga induktiv yo`l bilan olib kelamiz.
4+3=7, 7-4=3, 7-3=4. kabi bir qator mashqlar bajarilgandan keyin o`quvchilar quyidagicha umumiy xulosani ifodalaydilar. Agar yig`indidan birinchi qo`shiluvchi ayrilsa, ikkinchi qo`shiluvchi qoladi, agar yig`indidan ikkinchi qo`shiluvchi ayrilsa, birinchi qo`shiluvchi qoladi.
Deduksiya metodi bilishning shunday yo`liki, bunda umumiy bilimlar asosida yangi xususiy bilimlarni olishdan iborat. Deduksiya – bu umumiy qoidalardan xususiy misollarga va aniq qoidalarga o`tishdir.
M: 7-5= ni yechish uchun 7 sonini 5+2 kabi qarash mumkinligi eslatiladi. Agar yig`indidan (7) qo`shiluvchilardan biri (5) ni ayrilsa, boshqa qo`shiluvchi kelib chiqadi. Shunga o`xshash misollar yechish natijasida o`quvchilar yig`indi va qo`shiluvchilar orasidagi bog`lanishlarni bilganliklari asosida yangi bilimga ega bo`ladilar.
Deduksiyadan foydalanishda yo`l qo`yiladigan xatolar ko`pincha o`zlashtirilgan umumiy qoida konkret hol uchun qo`llanilishi mumkin yoki mumkin emasligini aniqlay olmaslikdan kelib chiqadi. Bu holni o`qituvchi nazarda tutib, masalan, ko`paytirishning aniq mazmunini mustahkamlashda 4+4+4 kabi misollar bilan bir qatorda 4+4+3+4 kabi hollarni ham qarash zarur.
Analogiya-shunday xulosaki, bunda predmetlar ba’zi belgilarning o`xshashligi bo`yicha bu predmetlar boshqa belgilari bo`yicha ham o`xshash, degan taxminiy xulosa chiqariladi. Analogiya «xususiydan xususiyga boradigan» bir aniq faktdan boshqa aniq faktlarga boradigan xulosadir.
M: 3 xonali sonlarni qo`shish va ayirishning yozma usullarini ko`p xonali sonlarni qo`shish va ayirishga o`tkazish analogiyaga asoslangan.
752 4752 54752 837 6837 76837
+ 246 +3246 +43246 -425 -2425 -52425
Bunday misollarni yechgandan keyin o`quvchilarning o`zlari ko`p xonali sonlarni yozma qo`shish va ayirish 3 xonali sonlarni yozma qo`shish va ayirish kabi bajariladi deb xulosa chiqarishadi.
Ba’zida analogiyadan foydalanib noto`g`ri xulosa qiladilar. M: 12-6= ni bajarishdan 14 javobni topadilar.
Bu metodlardan foydalanish asosida aqliy operatsiyalar: analiz, sintez, taqqoslash, umumlashtirish va abstraktsiyalash yotadi.
Butunni uning tashkil etuvchi qismlarga ajratishga yo`naltirilgan fikrlash usuli analiz deb ataladi.
Predmetlar yoki hodisalar orasidagi bog`lanishlarni o‘rnatishga yo`naltirilgan fikrlash usuli sintez deb ataladi.
Misollar: O`qituvchining 1 o`nlik va 2 ta birlikdan tuzilgan son qanday ataladi degan savolga javob berishda sintez qilinadi, 25 sonida nechta o`nlik va nechta birlik bor degan savoliga javob berishda analiz qilinadi.
Analiz va sintez o`zaro bog`liqdir bu masala yechishda keng qo`llaniladi.
M: Bir tup g`o`zadan 6 ta chanoq, ikkinchi tupdan 4 ta chanoq paxta olindi. Ikkala tup g`o`zadan necha chanoq paxta olingan?
Masalaning analizi - uni berilgan va izlanayotganlarga ajratishdan iborat. Sintez –masala savoliga javob berishda 6 va 4 sonlarini birlashtirishdan iborat.
Taqqoslash usuli qaralayotgan sonlar, arifmetik misollar, masalalarninng o`xshash va farqli alomatlarini ajratishdan iborat.
Boshlang`ich sinflarda sonlarni, ifodalarni taqqoslash, masalalarni taqqoslash kabilar qaraladi.
Yangi tushunchalarni, qonunlarni o`rganishda o`quvchilar umumlashtirishga duch keladilar.
Umumlashtirish bu o`rganilayotgan ob’yektlardan umumiy muhim tomonlarini ajratish va ularni nomuhimlardan ajratishdan iborat. O`quvchilarda to`g`ri umumlashtirishlar shakllantirishning zaruriy sharti tushunchalarning, xossa va faktlarning muhim alomatlarini o`zgartirmagan holda nomuhim alomatlarini o`zgartirishdan iborat.
M: To`g`ri to`rtburchak haqida tasavvurga keltirish uchun nomuhim alomatlar, rangi, tayyorlangan materiali, tekislikdagi holati, tomonlari uzunliklari munosabatlarini tushuntirish kerak.
Muhim alomatlarni o`zgarishsiz qoldirish kerak, ya’ni hamma burchaklari to`g`riligi, qarama - qarshi tomonlari tengligi saqlanib qolishi kerak.
|
| |
