| AVTOMATİK KEÇİD İŞARƏVERMƏSİ
Keçidlər dəmiryol xəttinin, avtomobil yolu ilə bir səviyyədə kəsişdiyi yerlərdə qurulur. Keçidlər nizamlanan yəni, keçid işarəverici qurğusu ilə təchiz olunmuş və nizamlanmayan, yəni təhlükəsizliyin təmin olunması avtomobil sürücüsündən asılı olanlara bölünür. Bir çox hallarda keçid işarəvericisi keçid növbətçisinin nəzarətində idarə olunur. Keçidlər qorunan və qorunmayanlara bölünür.
Keçid qurğularına avtomatik svetofor işarəvericisi, avtomat şlaqbaum, elektrik şlaqbaumu və mexaniki şlaqbaumlar daxildir. Belə qurğuların hamısı keçidə qatar yaxınlaşan zaman avtonəqliyyat vasitələrinin hərəkətinin dayandırılmasına xidmət edir. Avtonəqliyyat vasitələrinin intensiv hərəkəti olan keçidlərdə avtomobil yolu tərəfindən yolu çəpərləmək məqsədi ilə svetofor və avtomat şlaqbaum quraşdırılır (şəkıl 8).
Keçid svetoforu iki qırmızı qırpışan işıqla və səs işarəsi ilə təchiz olunur. Qirpışan svetofor o məqsədlə qurulur ki, sürücü keçid ilə adi yol ayırıcını qarışıq salmasın. Keçid işarəvericisindən 40 – 50 m və120 – 150 m əvvəl xəbərdaredici siqnallar quraşdırılır. Avtomat şlaqbaum və svetofor avtomobil yolunun sağında yerləşdirilir. Keçidlərdə avtomat şlaqbaumun normal vəziyyəti açıq, elektrik və mexaniki şlaqbaumun vəziyyəti bağlı olur. Avtomat keçid işarəvericisinin hərəkətə gətirilməsi üçün avtobloklamanın rels dövrəsindən istifadə olunur.
Qatar keçidə yaxınlaşan zaman keçid işarəvericisi işə düşür, xəbərdarlıq zəngi çalınır, 10 – 12 saniyədən sonra şlaqbaum bağlanır və zəng dayanır, svetoforun işığı isə qatar keçid sahəsini boşaldana qədər yanır. Keçiddə qəza baş verən zaman keçid qatarların hərəkəti istiqamətində çəpərlənir. Avtobloklama ilə təchiz olunmuş sahələrdə hər iki istiqamətdə svetoforlar qırmızı yanır.
|
