Hozirgi kunda inson faoliyatida ma'lumotlar bazasi (MB) kerakli
axborotlarni saqlash va undan oqilona foydalanishda juda muhim rol o'ynamoqda.
Jamiyat taraqqiyotining qaysi jabhasiga nazar solmaylik o'zimizga kerakli
ma'lumotlarni olish uchun MBga murojaat qilishga to'g'ri keladi. Demak, MBni
tashkil qilish axborot texnologiyalarining eng dolzarb hal qilinadigan
muammolaridan biriga aylanib borayotgani davr taqozasidir.
Axborot texnologiyalarning rivojlanishi va axborot oqimlarini tobora ortib
borishi, ma'lumotlarning tez o'zgarishi kabi holatlar insoniyatni bu ma'lumotlarni
o'z vaqtida qayta ishlash choralarining yangi usullarini qidirib topishga
undamoqda. Ma'lumotlarni saqlash, uzatish va qayta ishlash uchun MBni yaratish,
so'ngra undan keng foydalanish bugungi kunda dolzarb bo'lib qolmoqda. Moliya,
ishlab chiqarish, savdo-sotiq va boshqa sohalarni ma'lumotlar bazasisiz tasavvur
qilib bo'lmaydi.
Ma'lumki, MB tushunchasi fanga kirib kelgunga qadar, ma'lumotlardan turli
ko'rinishda foydalanish juda qiyin edi. Dastur tuzuvchilar ma'lumotlarini shunday
tashkil qilar edilarki, u faqat qaralayotgan masala uchungina o'rinli bo'lardi. Har
bir yangi masalani hal qilishda ma'lumotlar qaytadan tashkil qilinar va bu hol
yaratilgan dasturlardan foydalanishni qiyinlashtirar edi.
Har qanday axborot tizimining maqsadi real muhit ob'ektlari haqidagi
ma'lumotlarga ishlov berishdan iborat. Keng ma'noda ma'lumotlar bazasi - bu
qandaydir bir predmet sohasidagi real muhitning aniq ob'ektlari haqidagi
ma'lumotlar to'plamidir.
