| O‘tuvchi o‘zgartkichli defektoskoplar. Sifatni avtomatlashtirilgan, juda tez va kontaktsiz usulda nazorat qilishda o‘tuvchi o‘zgartkichli defektoskoplardan samarali foydalaniladi, ular uzun ob’ektlar (quvurlar, chiviqlar, ko‘ndalang o‘lchamlari 0,15 – 135 mm bo‘lgan simlar) hamda mayda detallar (podshipniklar zoldirlari va roliklari, metall buyumlar va b.) ni keng tur-o‘lchamlar doirasida tekshirishga imkon beradi. Bunda nazorat unumdorligi 50m/s ni (sim uchun) yoki soatiga bir necha ming mayda detallarni tashkil etishi mumkin. Quvurlar, chiviqlarni nazorat qilish unumdorligi tashish hamda yaroqsizga chiqarish qurilmalarining inersionligi bilan cheklanib, kamdan kam hollarda 3 m/sek dan oshadi.
Defektoskopning asosiy parametri sezgirlik bo‘sag‘asi berilgan shakldagi nuqsonning eng kichik o‘lchamlari bilan belgilanadi, bunday o‘lchamlarda signal halaqit nisbati ikkiga teng buladi. Sezgirlik bo‘sag‘asi odatda turli shakldagi, masalan, quvurlar va chiviqlardagi har xil diametrli teshiklar ko‘rinishidagi, simdagi bo‘ylama chiziqlar ko‘rinishidagi sun’iy nuqsonlari bo‘lgan kalibrlangan namuna yordamida aniqlanadi. Real sezgirlik bo‘sag‘asi ob’ekt parametrlarining juz’iy o‘zgarishi (variatsiya) bilan bog‘liq bo‘lgan halaqitlar darajasiga, masalan, yuzaning g‘adir budurligi va hokazolarga bog‘liq bo‘ladi. O‘tuvchi o‘zgartkichli defektoskopning sezgirlik bo‘sag‘asi odatda, ko‘ndalang o‘lcham (detalning diametri) foizida ifodalangan bo‘ylama uzun tor nuqsonning chuqurligi bilan belgilanadi.
Defektoskoplar asosan tuzilishi, saralash bloklari, axborotni berish va qayd qilish bloklari, nuqsonli qismlarni markirovkalash bloklari, magnitlash bloklari va hokazolar mavjudligi bilan farq qilinadi. Hozirgi vaqtda mamlakatimizda IPP-1M, TNM-1M, IDP-1, VD-30P, ASK-12, EZTM, DKV-2, VD-20P defektoskoplaridan foydalanilmoqda.
IPP-1M defektoskopi potok usulida ishlab chiqarish sharoitida ferromagnit va noferromagnit metallar hamda qotishmalardan tayyorlangan 4 - 47 mm diametrli dumaloq va olti yoqli chiviqlar yuzasidagi nuqsonlarni aniqlash uchun mo‘ljallangan. Bo‘sag‘a nuqsonining chuqurligi diametrning 1 – 2% ini, ammo ko‘pi bilan 0,1 mm ni, uzunligi 2 mm ni tashkil qiladi.
IDP-1 asbobi ferromagnit va noferromagnit metallar hamda qotishmalardan ishlangan 1 – 5 mm diametrli chiviqlar yuzasidagi nuqsonlar: darzlar, bushliqlar va hokazolarni aniqlashga mo‘ljallangan. Busag‘a nuqsonining chuqurligi 0,05 mm.
Diametri 60 mm dan oshmaydigan payvandlab yasalgan ferromagnit quvurlar EZTM defektoskopi yordamida nazorat qilinadi. Uch o‘ramli transformator tizimi ko‘rinishida tayyorlangan o‘tuvchi o‘zgartkich qurilmaning kuyindilar, moylar mavjud bo‘lganda yuqori haroratlar sharoitida ishonchli ishlashini ta’minlaydi. Defektoskop payvand chokdagi payvandlanmay qolgan joylarni aniqlaydi va gidrosinovlarni almashtirish uchun ishonchli asos bo‘lib xizmat qiladi.
Materiallarining navlari, tur-o‘lchamlari va markalari turli tuman bo‘lgan uzun buyumlarni nazorat qilish uchun universal VD-30P defektoskopi ishlab chiqilgan.
Xorijiy defektoskoplardan eng mukammali Ferster institutida (Germaniya) yaratilgan asboblardir. Mamlakatimizda ulardan ferromagnit (asosan) va noferromagnit materiallar hamda qotishmalardan ishlangan quvurlar, chiviqlar va simlarni nazorat qilish uchun muvaffaqqiyat bilan foydalanilmoqda. Quvur va chiviqlar “Defektograf 2.181”, “Defektovar 2.187”, “Defektomat 2.189” asboblari bilan, 1000°S gacha qizdirilgan chiviqlar, simlar esa “Defektoterm 2.186” asbobi yordamida nazorat kilinadi. Ularning hammasi axborot modulyasion va proeksiya usullarida chiqariladigan tuzilmaviy sxemalarga binoan ishlab chiqarilgan. Asboblar kalta uyg‘otuvchi g‘altaklari bo‘lgan o‘tuvchi o‘zgartkichlar to‘plami bilan, “Defektovar” esa quvurlarning ichki yuzasini nazorat qilish uchun “Intratest 2.187.1” qurilmasi bo‘lgan ichki o‘tuvchi o‘zgartkichlar tuplami bilan ta’minlangan.
|
