147
Yangi obyektni qurish ishlarini 2021-yil oxiriga qadar boshlash koʻzda tutilgan. 2023-yil
aprel oyida ishlab chiqarish quvvatlarining birinchi bosqichi (250 MVtgacha) va 2024-yil oxiriga
qadar barcha quvvatlarni foydalanishga topshirish rejalashtirilgan.
Joriy yil sentyabr oyida “Masdar” kompaniyasi Tomdi tumani mintaqasida shamol
salohiyatini oʻrganish uchun toʻrtta meteorologik ustun oʻrnatdi. Bu Navoiy viloyatida 500 MVt
quvvatga ega shamol elektr stansiyasini qurish loyihasini amalga oshirishning navbatdagi bosqichi
boʻldi.
“Masdar” — Abu-Dabi hukumatining “Mubadala Investment Company” kompaniyasining
shoʻba korxonasi hisoblanadi. U qayta tiklanadigan energiya ishlab chiqarishni rivojlantirishga
ixtisoslashgan yetakchi xalqaro kompaniyalardan biri.
Amirliklar kompaniyasi quyosh elektr stansiyasini qurish va undan foydalanish uchun
xorijiy investorni tanlash boʻyicha Oʻzbekiston tarixida birinchi marta oʻtkazilgan kimoshdi
savdosining gʻolibi boʻldi. “Masdar” kompaniyasi bir kVt.s uchun 2,67 AQSH senti miqdorida
dunyoda eng past tariflardan birini taklif qildi. 2019-yilning noyabrida Investitsiyalar va tashqi
savdo vazirligi bilan imzolangan investitsiyaviy bitimga koʻra, “Masdar” kompaniyasi oʻz
zimmasiga quyosh elektr stansiyasini loyihalash, moliyalashtirish, qurish hamda 25 yil davomida
undan foydalanish boʻyicha majburiyatlarni olgan edi.
Quyosh elektr stansiyasi 2021-yilning avgust oyida ishga tushirildi.
Loyiha Oʻzbekiston hukumatining mamlakat energiya balansini diversifikatsiya qilish,
jumladan, 2030-yilga borib respublikada quyosh energetikasi inshootlarining umumiy quvvatini 5
GVt ga yetkazishga yoʻnaltirilgan dasturning bir qismidir.
“Masdar” kompaniyasi loyihaga 100 million dollardan ortiq miqdorda toʻgʻridan-toʻgʻri
investitsiyalar kiritdi va qurilish bosqichida 150 ta ish oʻrni yaratdi. Quyosh elektr stansiyasining
ishga tushirilishi esa yiliga 260 million kVt.s miqdorida elektr energiyasini ishlab chiqarishni
taʼminladi.
Qayta tiklanadigan energiya manbalarining joriy etilishi elektr energiyasini ishlab
chiqarish uchun foydalaniladigan tabiiy gaz hajmini (yiliga 175 mln kub metrgacha)
kamaytirishga, shuningdek, atmosferaga chiqariladigan karbonat angidrid chiqindilarini sezilarli
darajada kamaytirishga yordam beradi (yiliga 1,1 mln tonnagacha).
“Masdar” kompaniyasi Abu-Dabi hukumatining “Mubadala Investment Company”ning
shoʻba korxonasi va dunyoning qayta tiklanadigan energiya ishlab chiqaruvchi yetakchi xalqaro
kompaniyalaridan biridir. Kompaniya tomonidan amalga oshirilgan investitsiyaviy loyihalar
portfeli qayta tiklanadigan manbalardan quvvati 4000 MVt dan ortiq elektr energiyasini ishlab
chiqaradigan inshootlarni oʻz ichiga oladi.
