Buxgalteriya hisobining metodi oldingi boblarda ko‘rib chiqilgan balans, hujjatlashtirish va
inventarizatsiya, schetlar va ikki yoqlama yozuv usullaridan tashqari,
baholash va
kalkulyatsiya kabi
elementlarni ham o‘z ichiga oladi. Ular buxgalteriya hisobi ob’ektlarini qiymat o‘lchovida ifodalash
usullari bo‘lib, xo‘jalik yurituvchi sub’ektlar moliya-xo‘jalik faoliyatining pul o‘lchovidagi
ko‘rsatkichlariga ega bo‘lish uchun qo‘llaniladi. Bozor munosabatlarining rivojlanishi natijasida bu
usullarni qo‘llashning ahamiyati yanada oshib bormoqda.
O‘zbekiston Respublikasi «Buxgalteriya hisobi to‘g‘risidagi» qonunining 4-moddasiga
muvofiq barcha asosiy va joriy aktivlar, majburiyatlar, xususiy kapital, daromadlar va xarajatlar
hamda moliya-xo‘jalik faoliyatining boshqa tomonlari buxgalteriya hisobining ob’ektlari
hisoblanadi.
Ushbu hisob ob’ektlarini yagona o‘lchov –
pul o‘lchoviga keltirish uchun ularni baholash
ya’ni pulda ifodalash zarur.
