| O’zgaruvchi.
O’zgaruvchilar nima ekanligini tushunish dasturlashda katta ahamiyatga ega. O’zgaruvchini qiymatlarni o’zida saqlay oladigan qurilmaga o’xshatish mumkin. Misol uchun sonlarni. Dastur bajarilayotgan vaqtda bu qurilma qiymatlari o’zgarishi yoki boshqa qurilma qiymatlarini qabul qilishi mumkin.
Amaldagi barcha dasturlarda hisoblash ishlarini olib borish uchun turli qiymatlar kompyuter xotirasida saqlanadi. Masalan, kvadrat tenglamani yechish dasturida koeffisiyentlari, diskriminant va tenglama ildizlari uchun o’zgaruvchilar kerak bo’ladi. O’zgaruvchiga shunday ta’rif berish mumkin: O’zgaruvchi – bu kompyuter xotira(yacheyka)sidagi maydondir.
Dasturda qatnashadigan har bir o’zgaruvchiga alohida nom berilishi shart. O’zgaruvchini nomlashda lotin alfaviti, son va bir nechta ishchi belgilardan foydalanish mumkin. O’zgaruvchining birinchi harfi lotin bo’lishi kerak. O’zgaruvchini e’lon qilishda yoki undan foydalanishda bo’sh joy (Space) belgisini qo’yish mumkin emas. Undan tashqari Object Pascal buyruqlarini ham o’zgaruvchi nomi sifatida ishlatish mumkin emas (Begin, end, Private, For,…).
Embarcadero RAD Studio kompilyatori katta yoki kichik yozilgan belgilarni farqlamaydi, shuning uchun SUMMA, Summa va summa deb nomlangan o’zgaruvchilar aynan bir xildir.
| 