|
HOZIRGI LANDSHAFTLAR VA ULARNING TASNIFLANISHI
|
| bet | 5/11 | | Sana | 16.05.2024 | | Hajmi | 95,52 Kb. | | #236983 |
Bog'liq Turdiyev sardorning-fayllar.org3. HOZIRGI LANDSHAFTLAR VA ULARNING TASNIFLANISHI
Insonning tabiatga ta’siri va bu ta’sir tufayli tabiiy landshaftlar yoki ularning ayrim komponentlarining (lot. komponens tashkil etuvchi) o‘zgarishini o‘rganish muammolari anchadan buyon mavjud (J. Marsh, V.V. Dokuchaev, A.I. Voyeykov, V.V. Alyoxin va b.). Insonning xo‘jalik faoliyati jarayonida shakllangan landshaftlarni madaniy landshaftlar deb atash rusumga kirdi. “Madaniy landshaft” termini hozirgi ma’noda F.Zigrayning taxminicha birinchi bor N. Krebs tomonidan 1923 yilda ilmiy muomalaga kiritilgan.[5]
Madaniy landshaftlarni tizimli o‘rganishga, antropogen geografiya poydevorining shakllanishiga taniqli rossiyalik geograf olim Y.G. Saushkinning madaniy landshaftlarni tadqiq qilishga doir ishi asos bo‘ldi, deb hisoblash mumkin. 1946 yilda chop etilgan maqolalaridan birida Y.G.Saushkin “madaniy landshaft-larni o‘rganish uchun geografiyaning alohida tarmog‘i bo‘lishi kerak” degan g‘oyani ilgari surdi va madaniy landshaft deb “... tabiiy muhitning uzviy elementlari inson faoliyati tufayli o‘zgartirilgan landshaftni tushunmoq lozim”ligini ta’kidlaydi (Saushkin, 1947 ). Yuqorida ta’kidlanganidek, sayyoramizning deyarli barcha katta – kichik hududlarida tarqalgan hozirgi landshaftlar inson faoliyati tufayli bevosita yoki bilvosita muayyan darajada o‘zgartirilgan. Shu sababli hozirgi landshaftlar asosan antropogen landshaftlarning ozmi – ko‘pmi o‘zgartirilgan tabiiy landshaftlar bilan bo‘lgan hududiy birikmasidan iborat. Umuman olganda, Yer sharida ma’lum darajada o‘zgartirilmagan tabiiy landshaftlardeyarli saqlanib qolmagan, deb hisoblash mumkin. Chunki geografik qobiqdagi modda va energiyaning uzluksiz aylanma harakati tufayli inson faoliyatining ta’siri ostida bo‘lmagan Antarktida va Antarktikaning landshaft komponentlarida ham, baland tog‘ minqatalarida ham namoyon bo‘ladi. Hozirgi paytda muayyan hudud tabiatidan foydalanish jarayonida vujudga kelgan antropogen landshaftlarning mavjudligini ko‘pchilik olimlar e’tirof etishadi. Ammo antropogen landshaftlarning terminologik, tizimga solish va tasniflashga doir masalalar borasida hanuzgacha yakdillik yo‘q. Antropogen landshaftlar o‘zgarish darajasiga ko‘ra turli – tuman bo‘lgan hozirgi landshaftlarning muayyan bir turini tashkil etadi.
Shu sababli hozirgi landshaftlarni tasniflash antropogen landshaftlarning mohiyati va xususiyatlarini ochib berish imkoniyatini beradi.Hozirgi landshaftlarni antropogen omillar ta’siri ostida o‘zgarish (antropogenlashish) darajasiga ko‘ra tasnif qilish maqsadida mavjud masalaga doir adabiyotlar bilan tanishuv va tahlil qilish asosida hozirgi landshaftlarning 4 ta asosiy guruhini ajratish mumkin:
1. Tabiiy (birlamchi) landshaftlar – inson xo‘jalik faoliyatining bevosita ta’siri deyarli bo‘lmagan landshaftlar. Tabiiy landshaftlar hozirgi paytda baland tog‘ mintaqalarida, ulkan cho‘llarning ichki hududlarida, Arktika va Antarktidada, tayga va tropik o‘rmonlar o‘sadigan ayrim hududlarda saqlanib qolgan. Tabiiy landshaftlar tarqalgan hududlar tabiatidan hozirgi sharoitlarda xo‘jalikda foydalanilmaydi va shu tufayli ularning tabiiy tuzilmasi deyarli o‘zgarmagan. Bu landshaftlar asosan ilmiy va rekreatsiya maqsadlaridagina foydalaniladi. Bu guruhga mansub bo‘lgan landshaftlarni tabiiy holatda saqlab qolish global miqyosdagi ekologik muammolar yechimida muhim ahamiyatga ega bo‘lar edi.
2. Tabiiy – antropogen landshaftlar guruhi qisman insonning xo‘jalik faoliyati ta’siri ostida bo‘lgan landshaftlardir. Bunday landshaftlarda komponentlar orasida aloqalar kam (sust) buzilgan yoki inson tomonidan boshqarilib turiladi. Tabiiy- antropogen landshaftlarga tog‘ o‘tloqlari va o‘rmonlari, oqilona foydalaniladigan yaylovlar va o‘rmonlar tarqalgan hududlar kiradi.
3. Qayta tabiiylashgan (renaturlashgan) landshaftlar. Bu guruhga mansub bo‘lgan landshaftlar inson tomonidan yaratilgan, ammo keyinchalik uning aralashuvisiz rivojlangan landshaftlar (o‘rmon ihotazorlari) va shuningdek, qachonlardir o‘zlashtirilgan va xo‘jalikda foydalanilgan, ammo keyinchalik turli iqtisodiy – tarixiy sabablarga ko‘ra foydalanilmay qo‘yilgan va tabiiy omillar ta’siri ostida rivojlangan landshaftlar kiradi. Tabiiylashgan landshaftlarda inson faoliyatining “izlarini”ni ko‘rish mumkin. O‘zbekistonning bir qator yelarida qadimda obikor dehqonchilikda foydalanilgan, ammo hozirgi paytda tashqi ko‘rinishi va tuzilmasiga ko‘ra yaqin atrofdagi landshaftlardan farq qilmaydigan landshaftlarni ajratishi mumkin. Bunday landshaftlarda ariqlarning hamda sug‘orish bilan bog‘liq bo‘lgan mikro- va nonorelyef shakllari saqlanib qolgan. Qarshi cho‘lidagi bunday landshaftlarni O.Y. Poslavskaya (1969) “relikt madaniy landshaftlar” deb ataydi. Tabiiylashgan landshaftlarni, shuningdek, tog‘ oldi va tog‘ hududlarida ham ajratish mumkin. Tabiiylashgan landshaftlarni o‘rganish muhim ilmiy – amaliy ahamiyatga ega. Chunki bu guruhga mansub bo‘lgan landshaftlar dinamikasida ham tabiiy, ham antropogen omillarning xususiyatlarini belgilash mumkin. Pirovardida landshaftlarni xo‘jalik maqsadida o‘zlashtirish hamda foydalanishda tabiiylashuv va antropogenlashuv sharoitlarining xususiyatlarini e’tiborga olish tabiatdan oqilona foydalanishni tashkil etishning muhim geografik asosi bo‘lib xizmat qilishi mumkin.
Tabiiylashgan landshaftlar ko‘pdan buyon insonning xo‘jalik faoliyati ta’sirida bo‘lmaganligi hamda hozirgi sharoitlarda tabiiy jarayonlar ta’siri ostida bo‘lishi tufayli bunday landshaftlarni ajratishda ko‘pgina hollarda ularda uchraydigan “antropogen belgilar va izlar” e’tiborga olinadi. Tabiiylashgan landshaftlarni o‘rganish ayniqsa tarixiy geografiya uchun boy material berishi mumkin.
Shakllanish sharoitlariga ko‘ra qayta tabiiylashgan landshaftlar antropogen landshaftlarda o‘z–o‘zidan rivojlanish xususiyatining yo‘qligiga bog‘liq. Shu sababli antropogen landshaftlar o‘zlarida yuqorida aytilgan xususiyatning yo‘qligi boisidan foydalanilmay qo‘yilgach, tabiiy omillar ta’siri ostida rivojlana boshlaydi, ya’ni ular qayta tabiiylashadi (renaturlashadi). Ammo shu narsani alohida ta’kidlash lozimki, antropogen landshaftlar vaqtda va barcha joyda ham qayta tiklanish va tabiiylashuv jarayonida o‘zlarining dastlabki tabiiy tuzilmasini tiklay olmaydi va natijada biologik xususiyatlariga ko‘ra yomonroq va mahsuldorligiga ko‘ra birlamchi landshaftlarga ko‘ra kamroq biomassaga ega bo‘ladigan ikkilamchi tabiiy landshaftlar vujudga keladi. Kuzatishlar shuni ko‘rsatadiki, turli sabablarga ko‘ra xo‘jalikda foydalanilmasdan qo‘yilgan antropogen landshaftlar qayta tabiiylashuvi jarayonida aksariyat hollarda ibtidoiy yoki birlamchi tuzilmasini tiklay omaydi. Tabiatda aynan takrorlanmaydigan rivojlanishning mavjudligi antropogen landshaftlarni ham to‘liq qayta tabiiylashuviga imkon bermaydi, antropogen landshaftlar xo‘jalikda foydalanilganda (ya’ni antropogen omillar ta’siri ostida bo‘lgan paytda) o‘zlashtirilgan tabiiy landshaftning tuzilmasi tubdan o‘zgaradi va tuzilma qayta o‘z holatiga kela olmaydi. Chunki antropogen landshaftlarning qayta tabiiylashuv jarayoni o‘zgacharoq tabiiy sharoitlarda sodir bo‘ladi.
Ayrim tadqiqotchilar hozirgi landshaftlarni tasniflashda qayta tabiiylashgan landshaftlarni tabiiy – antropogen landshaftlar nomi bilan ajratishgan (Tyutyunnik, 1989). Hozirgacha va hozirgi sharoitlarda ham ayrim iqtisodiy – texnik (agrotexnik) sabablga ko‘ra antropogen landshaftlarning qayta tabiiylashuv jarayoni davom etmoqda. Ammo kelajakda aholi soni va uning ehtiyojlarining ortishi tabiiy resurslardan tejamkorlik asosida foydalanishni taqoza etadi. Shu sababli kelajakda fan – texnika taraqqiyoti va tabiiy resurslarga bo‘lgan ehtiyojlarning ortishi antropogen landshaftlarning qayta tabiiylashuviga yo‘l qo‘ymaydi. Bilaks hamma hududlarda tabiiy salohiyati madaniy landshaftlarni tashkil etish uchun yetarli bo‘lgan tabiiy hamda tabiiy – antropogen landshaftlarni madaniy landshaftlarga aylantirishni taqoza etadi. 4. Antropogen landshaftlar – tabiiy–ishlab chiqarish hududiy komplekslar bo‘lib, ularning rivojlanishi muntazam ravishda inson tomonidan boshqarilib turiladi.[8]
1-Jadval
|
| |
