O`zbekiston respublikasi oliy va o`rta maxsus ta`lim vazirligi

Windows operatsion tizimining tarkibida foydalanuvchi kompyuter bilan ishlashi jarayonida kerak bo`lishi mumkin bo`lgan ko`plab dasturlar Windows tizimi bilan birgalikda tekin tarzda tarqatiladi. Bunday dasturlar odatda Windows bosh menyusi (Pusk tugmasini bosilganda hosil bo`ladi)ning tarkibida joylashgan Vse programmi buyruqlar to`plamining ichidagi Standartnie to`plamida joylashgan bo`ladi. Bunday dasturlar sirasiga biz Bloknot oddiy matn muharriri, Paint grafik muharriri, WordPadmuharriri, manzillar kitobi, buyruq satri, masofadagi kompyuter ishchi stoliga ulanish dasturi, Provodnik (boshlovchi) menejer dasturi, skaner yoki web-kameralar bilan ishlash ustasi kabilarni kiritishimiz mumkin. Bu yerda ko`plab foydalanuvchilar o`z hisob-kitob ishlarida qo`llaydigan Kalkulyator dasturi ham joylashgan. Bu dasturni ishga tushirish uchun biz shu dastur nomi ustiga sichqoncha ko`rsatkichini keltirib, chap tugmasini bir marta bosishimiz kifoya qiladi. Bundan tashqari agar bu dasturning piktogrammasini ishchi stolga chiqarib qo`yilgan bo`lsa, uni ishga tushirish uchun sichqoncha ko`rsatkichini dastur belgisi (piktogrammasi) ustigakeltirib, chap tugmasini ikki marta tez bosish kerak bo`ladi. Agar dasturning belgisi Windows masalalar panelidagi tezkor tugmalar qatoriga ham o`rnatilgan bo`lsa, u yerdan ham dasturni sichqoncha chap tugmasini bir marta bosish orqali ishga tushirishimiz mumkin. Agar yuqorida keltirib o`tilgan usullarning birortasi orqali ham kalkulyator dasturini ishga tushirishning imkoni bo`lmasa, u holda so`nggi chora sifatida C:\WINDOWS\system32 manzilida joylashgan calc.exe faylini izlab topib, shu faylni ishga tushirish kerak bo`ladi. Bu usul ham qo`l kelmasa, u holda ushbu kompyuterda kalkulyator dasturi o`rnatilmagan degan xulosaga kelish mumkin bo`ladi va bunday hollarda boshqa chetki ishlab chiqaruvchilar tomonidan ishlab chiqarilgan kalkulyator dasturlaridan foydalanish mumkin. Lekin shuni ham hisobga olish kerakki, kalkulyator dasturi – bu juda oddiy dasturlardan hisoblanadi hamda bunday dasturni har bir foydalanuvchi o`zining ehtiyojlaridan kelib chiqqan holda ushbu kursning oxirgi mavzularidan bo`lgan Visual Basic, Delphi yoki boshqa zamonaviy dasturlash tillaridan foydalanib bemalol tuzishi mumkin.