(1-q.)
Suv resurslarining yer usti va yer osti manbalaridan olingan suv hajmi suvdan
foydalanishning buxgalteriya (dastlabki) hisobi hujjatlarida aks ettirilgan suv oʻlchagich asboblar
koʻrsatkichlari asosida aniqlanadi.
(2-q.)
Suvdan oʻlchagich asboblarsiz foydalanilgan taqdirda, uning hajmi suv obyektlaridan
suv olish limitlaridan, suvni isteʼmol qilishning texnologik va sanitariya normalaridan, ekinlar
hamda yashil daraxtzorlarni sugʻorish normalaridan yoki maʼlumotlarning toʻgʻriligini
taʼminlovchi boshqa usullardan kelib chiqqan holda aniqlanadi.
(3-q.)
Soliq toʻlovchilar yer usti va yer osti manbalaridan olib foydalanilgan suv resurslari
hajmlarining alohida hisobini yuritadi. Suv resurslarining yer usti va yer
osti manbalaridan suv
keladigan vodoprovod tarmogʻidagi suvdan foydalanilganda, soliq bazasi manbaning har bir turi
boʻyicha alohida aniqlanadi. Suv yetkazib berishni amalga oshiruvchi yuridik shaxslar
vodoprovod tarmogʻiga suv resurslarining yer usti va yer osti manbalaridan kelib tushadigan suv
hajmlarining nisbati toʻgʻrisidagi maʼlumotlarni soliq organlariga joriy soliq davrining 15-
yanvariga qadar taqdim etishi kerak. Soliq organlari uch kun ichida ushbu maʼlumotlarni soliq
toʻlovchilar eʼtiboriga yetkazishi lozim.
(4-q.)
Issiq suv hamda bugʻ hosil qilinishi boʻyicha soliq bazasi soliq toʻlovchi tomonidan
ishlab chiqarish va texnik ehtiyojlar uchun oʻzi foydalangan suv resurslari hajmidan kelib chiqqan
holda aniqlanadi.
(5-q.)
Binolarning bir qismi, alohida inshootlar ijaraga berilganda soliq bazasi suv yetkazib
berishni amalga oshiruvchi yuridik shaxs bilan shartnoma tuzgan ijaraga beruvchi tomonidan
aniqlanadi.
(6-q.)
Binolarning bir qismini, alohida inshootlarni ijaraga olgan va suv yetkazib berishni
amalga oshiruvchi soliq toʻlovchilar bilan shartnoma tuzgan yuridik shaxslar soliq bazasini
mustaqil ravishda aniqlaydi.
(7-q.)
Soliq toʻlovchilar yuridik shaxslar bilan suv yetkazib berilishi yuzasidan solishtirib
koʻrish jarayonida olingan suvning hajmini aniqlashtirishda suv hajmining
farqini solishtirish
amalga oshirilgan davrdagi hisob-kitoblarda aks ettiradi.
(8-q.)
Yuridik shaxslarning hududida taʼmirlash-qurilish ishlarini va boshqa ishlarni
bajaruvchi soliq toʻlovchilar ushbu ishlarni bajarish jarayonida foydalaniladigan suv uchun soliq
toʻlamaydi. Taʼmirlash-qurilish ishlarini va boshqa ishlarni bajarayotganda foydalaniladigan suv
hajmi uchun bu ishlar qaysi yuridik shaxslar uchun bajarilayotgan boʻlsa, oʻsha yuridik shaxslar
soliq toʻlaydi. Qurilish ishlari yangi qurilish maydonchasida bajarilgan taqdirda, qurilishda
foydalaniladigan suv hajmi uchun qurilish tashkiloti soliq toʻlaydi.
(9-q.)
Suvdan foydalanish va suv isteʼmoli sohasidagi vakolatli organ soliq bazasini aniqlash
uchun soliq organlariga, shuningdek qishloq xoʻjaligida, shu jumladan baliqchilik xoʻjaligida suv
resurslaridan foydalanuvchi yuridik shaxslarga ular tomonidan foydalanilishi
kutilayotgan suv
resurslarining hajmini har yili joriy soliq davrining 10-dekabridan kechiktirmay, dehqon
xoʻjaliklari, tadbirkorlik faoliyati va (yoki) daromad olish uchun moʻljallangan, yashash uchun
moʻljallanmagan koʻchmas mulk obyektlariga ega boʻlgan jismoniy shaxslar boʻyicha esa - suvdan
foydalanish yoki suvni isteʼmol qilish joyi boʻyicha soliq organlariga hisobot yilidan keyingi
yilning 20-yanvaridan kechiktirmay taqdim etadi.
(OʻzR 30.12.2022-y. OʻRQ-812-son
Qonuni
tahriridagi qism) (Oldingi tahririga qarang)
(10-q.)
Dehqon xoʻjaliklari, shuningdek qishloq xoʻjaligiga moʻljallangan yerlarga hamda
tadbirkorlik faoliyati va (yoki) daromad olish uchun moʻljallangan, yashash uchun
moʻljallanmagan koʻchmas mulk obyektlariga ega boʻlgan jismoniy shaxslar uchun soliq bazasi
suvdan foydalanish va suv isteʼmoli sohasidagi vakolatli organ taqdim etgan maʼlumotlarga asosan
soliq organlari tomonidan aniqlanadi.
(OʻzR 30.12.2022-y. OʻRQ-812-son Qonuni tahriridagi
qism) (Oldingi tahririga qarang)
(11-q.)
Sunʼiy suv havzalarida baliq yetishtiruvchi baliqchilik xoʻjaliklari soliq bazasini
tabiiy va sunʼiy suv obyektlaridan olingan va ushbu suv obyektlariga qaytarib quyiladigan suv
hajmi, bundan kollektor-drenaj tarmoqlariga qaytarib quyiladiganlar mustasno, oʻrtasidagi farqdan
kelib chiqib aniqlaydilar.
(OʻzR 30.12.2020-y. OʻRQ-659-son Qonuniga muvofiq kiritilgan qism)
(12-q.)
Qishloq xoʻjaligida, shu jumladan baliq yetishtirishda suv resurslarini hisobga olish
vositalari mavjud emasligi va foydalaniladigan suv resurslarining haqiqiy
hajmini aniqlashning
imkoni boʻlmagan taqdirda, soliq bazasi suvdan foydalanish va suvni isteʼmol qilish sohasidagi
vakolatli organ tomonidan tasdiqlangan suv resurslari isteʼmolining normativlariga koʻra
aniqlanadi.
(OʻzR 30.12.2020-y. OʻRQ-659-son Qonuniga muvofiq kiritilgan qism)
(13-q.)
Ishlab chiqarish jarayonida suvni maxsus uskunalarni (turbinalarni) sovitish uchun
ishlatadigan soliq toʻlovchilar soliq bazasini tabiiy suv obyektlaridan maxsus uskunalarni
(turbinalarni) sovitish uchun olingan va tabiiy suv obyektlariga qaytarib quyiladigan suv hajmi
oʻrtasidagi farqdan kelib chiqib aniqlaydi. Ushbu norma suvning haqiqiy hisobi yoki suvdan
maxsus foydalanish ruxsatnoma mavjud boʻlganda qoʻllaniladi.
(OʻzR 30.12.2020-y. OʻRQ-659-
son Qonuniga muvofiq kiritilgan qism)
OʻzR 30.12.2020-y. OʻRQ-659-son Qonuniga muvofiq oʻn birinchi va oʻn ikkinchi qismlari
oʻn toʻrtinchi va oʻn beshinchi qismlar deb hisoblansin
(14-q.)
Soliq toʻlovchi soliq toʻlash nazarda tutilmagan faoliyat
turlarini amalga oshirgan
taqdirda, soliq bazasi soliq solinadigan va soliq solinmaydigan suv resurslari hajmining hisobini
alohida yuritish asosida aniqlanadi. Alohida hisob yuritish imkoniyati boʻlmagan taqdirda, soliq
bazasi qaysi faoliyat boʻyicha soliq toʻlash sof tushumning umumiy hajmida nazarda tutilgan
boʻlsa, oʻsha faoliyatdan olinadigan sof tushumning solishtirma hajmidan kelib chiqqan holda
aniqlanadi.
(15-q.)
Alkogolli mahsulot va alkogolsiz ichimliklarni ishlab chiqarish va boshqa maqsadlar
uchun foydalanilgan suvning hajmi ishlab chiqaruvchi yuridik shaxslar uchun soliq bazasi
hisoblanadi. Alkogolli mahsulot va alkogolsiz ichimliklar ishlab chiqarish uchun foydalaniladigan
suv hajmi deganda isteʼmol idishidagi tayyor mahsulotga toʻgʻri keladigan suvning hajmi
tushuniladi.
(16-q.)
Soliq solish obyekti va (yoki) soliq stavkasi turli xil boʻlgan bir necha turdagi faoliyat
bilan shugʻullanuvchi soliq toʻlovchilar bunday faoliyat turlari boʻyicha
alohida-alohida hisob
yuritishlari va tegishli soliq stavkalari boʻyicha soliq toʻlashlari shart.
(OʻzR 30.12.2020-y. OʻRQ-
659-son Qonuniga muvofiq kiritilgan qism)
