|
O‘zbekistonda ta’limni raqamlashtirish yo‘nalishida qanday ishlar amalga oshirilmoqda?
|
| bet | 3/4 | | Sana | 19.05.2024 | | Hajmi | 223,33 Kb. | | #244053 |
Bog'liq ta\'limni raqamlashtirish.Islambek Rustambekov,
Yuridik fanlari doktori, professor.
Toshkent davlat yuridik universiteti rektori v.b
RAQAMLI O‘ZBEKISTON—2030” STRATEGIYASINI TASDIQLASH VA UNI SAMARALI AMALGA OSHIRISH CHORA-TADBIRLARI TO‘G‘RISIDA
O‘zbekiston Respublikasi Prezidentining
Farmoni
«RAQAMLI O‘ZBEKISTON—2030» STRATEGIYASINI TASDIQLASH VA UNI SAMARALI AMALGA OSHIRISH CHORA-TADBIRLARI TO‘G‘RISIDA
Mamlakatimizda raqamli iqtisodiyotni faol rivojlantirish, barcha tarmoqlar va sohalarda, eng avvalo, davlat boshqaruvi, ta’lim, sog‘liqni saqlash va qishloq xo‘jaligida zamonaviy axborot-kommunikatsiya texnologiyalarini keng joriy etish bo‘yicha kompleks chora-tadbirlar amalga oshirilmoqda.
Xususan, elektron hukumat tizimini takomillashtirish, dasturiy mahsulotlar va axborot texnologiyalarining mahalliy bozorini yanada rivojlantirish, respublikaning barcha hududlarida IT-parklarni tashkil etish, shuningdek, sohani malakali kadrlar bilan ta’minlashni ko‘zda tutuvchi 220 dan ortiq ustuvor loyihalarni amalga oshirish boshlangan.
Bundan tashqari, 40 dan ortiq axborot tizimlari bilan integratsiyalashgan geoportalni ishga tushirish, jamoat transporti va kommunal infratuzilmani boshqarishning axborot tizimini yaratish, ijtimoiy sohani raqamlashtirish va keyinchalik ushbu tajribani boshqa hududlarda joriy qilishni nazarda tutuvchi «Raqamli Toshkent» kompleks dasturi amalga oshirilmoqda.
Respublikada raqamli industriyani jadal rivojlantirish, milliy iqtisodiyot tarmoqlarining raqobatbardoshligini oshirish, shuningdek, 2017 — 2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini «Ilm, ma’rifat va raqamli iqtisodiyotni rivojlantirish yili»da amalga oshirishga oid davlat dasturida belgilangan vazifalar ijrosini ta’minlash maqsadida:
1. Axborot texnologiyalari va kommunikatsiyalarini rivojlantirish vazirligi tomonidan manfaatdor vazirlik va idoralar, biznes hamjamiyati va ilmiy doiralar vakillari hamda xorijiy ekspertlar ishtirokida ishlab chiqilgan «Raqamli O‘zbekiston — 2030» strategiyasi 1-ilovaga muvofiq ma’qullansin.
Quyidagilar:
2020 — 2022-yillarda hududlarni raqamli transformatsiya qilish dasturlari 2 — 14-ilovalarga muvofiq;
2020 — 2022-yillarda tarmoqlarni raqamli transformatsiya qilish dasturlari 15 — 21-ilovalarga muvofiq tasdiqlansin.
Bunda, 2020 — 2022-yillarda hudud va tarmoqlarni raqamli transformatsiya qilish doirasida:
aholi punktlarini Internet tarmog‘iga ulash darajasi, shu jumladan keng polosali ulanish portlarini 2,5 milliongacha ko‘paytirish, 20 ming kilometr optik-tolali aloqa liniyalarini qurish va mobil aloqa tarmoqlarini rivojlantirish orqali 78 foizdan 95 foizga yetkaziladi;
hududlarni ijtimoiy-iqtisodiy rivojlantirishning turli sohalarida 400 dan ortiq axborot tizimlari, elektron xizmatlar va boshqa dasturiy mahsulotlar joriy etiladi;
587 ming nafar kishini, shu jumladan «Bir million dasturchi» loyihasi doirasida 500 ming nafar yoshlarni qamrab olish orqali kompyuter dasturlash asoslariga o‘qitish tashkillashtiriladi;
iqtisodiyotning real sektori tarmoqlaridagi korxonalarda boshqaruv, ishlab chiqarish va logistika jarayonlarini avtomatlashtirish bo‘yicha 280 dan ortiq axborot tizimlari va dasturiy mahsulotlar joriy etiladi;
hududlarda hokimlar, davlat organlari va tashkilotlar xodimlarining raqamli savodxonligini va malakasini oshirish, ularni axborot texnologiyalari va axborot xavfsizligi bo‘yicha o‘qitish uchun tegishli oliy ta’lim muassasalari biriktiriladi hamda ularning 12 ming nafar xodimi axborot texnologiyalari sohasida o‘qitiladi.
2. Axborot texnologiyalari va kommunikatsiyalarini rivojlantirish vazirligi, Qoraqalpog‘iston Respublikasi Vazirlar Kengashi va viloyat hokimliklarining 29 ta namunaviy tumanlarda (shaharlarda) 2020-yilda va 2021-yil I choragi yakuniga qadar raqamli transformatsiya qilish loyihalarini ko‘zda tutuvchi «yo‘l xarita»larini 2a — 14a, 2b — 14b hamda 2v, 8v va 12v-ilovalarga muvofiq amalga oshirish to‘g‘risidagi taklifi ma’qullansin.
3. «Raqamli O‘zbekiston — 2030» strategiyasini amalga oshirish bo‘yicha muvofiqlashtirish komissiyasi (keyingi o‘rinlarda — Muvofiqlashtirish komissiyasi) 22-ilovaga muvofiq tarkibda tashkil etilsin va quyidagilar uning asosiy vazifalari etib belgilansin:
davlat organlari va tashkilotlari, mahalliy ijro etuvchi hokimiyat organlari tomonidan Strategiya, hududlar va tarmoqlarni raqamli transformatsiya qilish dasturlari, «yo‘l xarita»larida ko‘zda tutilgan loyiha va chora-tadbirlarning to‘liq hajmda amalga oshirilishini ta’minlash, shuningdek, ularning o‘z vaqtida bajarilishini tizimli nazorat qilish;
har oyda davlat organlari va tashkilotlari rahbarlarining raqamli iqtisodiyot va elektron hukumatni rivojlantirish bo‘yicha rejalashtirilgan loyihalar va chora-tadbirlarni amalga oshirish yuzasidan hisobotlarini tinglash hamda ularning javobgarligi masalasini ko‘rib chiqish;
doimiy monitoring asosida elektron davlat xizmatlarini ko‘rsatishni yanada takomillashtirish, davlat organlari va tashkilotlari faoliyatidagi funksional jarayonlar va tartib-taomillarni optimallashtirish bo‘yicha choralar ko‘rish;
raqamli iqtisodiyot sohasidagi yangi loyihalarni ko‘rib chiqish va ularni amalga oshirish to‘g‘risida qarorlarni qabul qilish, shuningdek, zarur hollarda hudud va tarmoqlarni raqamli transformatsiya qilish dasturlari hamda «yo‘l xarita»lariga tayyorlangan va kelishilgan loyiha hujjatlari asosida o‘zgartirish va qo‘shimchalar kiritish.
4. Muvofiqlashtirish komissiyasi (A. Aripov) Qoraqalpog‘iston Respublikasi Vazirlar Kengashi raisi va viloyatlar hokimlari bilan birgalikda bir hafta muddatda 29 ta namunaviy tumanlarda (shaharlarda) raqamli transformatsiya qilish «yo‘l xarita»larini amalga oshirish bo‘yicha quyidagilarni nazarda tutgan holda hududiy ishchi guruhlarni shakllantirsin:
Axborot texnologiyalari va kommunikatsiyalarini rivojlantirish vazirligi, uning tasarrufidagi tashkilotlar va hududiy boshqarmalarining mas’ul rahbarlarini tegishli tumanlarga (shaharlarga) biriktirish;
har o‘n kunlikda ishchi guruhlar tomonidan qabul qilingan raqamli transformatsiya qilish «yo‘l xarita»larida nazarda tutilgan loyihalarni amalga oshirish samaradorligi va joylarda o‘tkazilayotgan tadbirlarning amaliy ahamiyatini baholash;
ixtisoslashtirilgan oliy o‘quv yurtlari va raqamli texnologiyalarni o‘qitish markazlari negizida davlat organlari va tashkilotlari, mahalliy ijro etuvchi hokimiyat organlarining mas’ul rahbarlarini o‘qitish va malakasini oshirishni tashkil etish.
5. Axborot texnologiyalari va kommunikatsiyalarini rivojlantirish vazirligi Maktabgacha ta’lim vazirligi, Xalq ta’limi vazirligi va Sog‘liqni saqlash vazirligi bilan birgalikda 2020-yil yakuniga qadar 13 ta namunaviy tumanlarda (2a — 14a-ilovalar) IT-infratuzilmasini yaratishni, kompyuter uskunalari bilan jihozlashni nazarda tutgan holda maktabgacha va umumta’lim maktablari hamda sog‘liqni saqlash muassasalarini raqamlashtirishni yakunlash bo‘yicha choralar ko‘rish, shuningdek, axborot tizimlarini joriy etish va mas’ul xodimlarni o‘qitishni tashkil etsin.
Belgilansinki, ushbu muassasalarni raqamlashtirish Axborot texnologiyalari va kommunikatsiyalarini rivojlantirish vazirligi va tasarrufidagi tashkilotlarning o‘z mablag‘lari hisobidan, yetishmayotgan qismida esa — mahalliy budjetning qo‘shimcha manbalari hisobidan amalga oshiriladi.
6. Belgilab qo‘yilsinki, O‘zbekiston Respublikasining xorijiy mamlakatlardagi diplomatik vakolatxonalari 23-ilovaga muvofiq biriktirilgan hududlar va tarmoqlarga ilg‘or texnologiyalar va IT-yechimlarni transfer qilishda, raqamli iqtisodiyot sohasidagi loyihalarni birgalikda amalga oshirish uchun yetakchi kompaniyalarni jalb qilishda har tomonlama amaliy yordam ko‘rsatadilar.
7. Investitsiyalar va tashqi savdo vazirligi Axborot texnologiyalari va kommunikatsiyalarini rivojlantirish vazirligi bilan birgalikda 2020-yil 1-noyabrdan boshlab investitsiya loyihalari hamda jalb etilayotgan xalqaro moliya institutlari, xorijiy hukumat moliya tashkilotlari va donor mamlakatlar mablag‘lari umumiy miqdorining 5 foizdan kam bo‘lmagan qismi «raqamli» komponentlarga yo‘naltirilishini ko‘zda tutsin.
8. Quyidagilarni nazarda tutuvchi 2020 — 2022-yillarda «Raqamli O‘zbekiston — 2030» strategiyasini amalga oshirish bo‘yicha «yo‘l xarita»si 24-ilovaga muvofiq tasdiqlansin:
a) elektron hukumatni rivojlantirish bo‘yicha:
2021-yil 1-yanvardan boshlab tajriba tariqasida «Raqamli Toshkent» kompleks dasturi doirasida jismoniy shaxsga identifikatsiya ID-kartasini berishda davlat organlari va tashkilotlari bilan o‘zaro elektron munosabatlarni yo‘lga qo‘yish uchun uning shaxsiy kabineti shakllantiriladi;
2021-yil 1-iyuldan boshlab O‘zbekiston Respublikasi Ochiq ma’lumotlar portalida davlat organlari va tashkilotlari tomonidan davlat xaridlarini amalga oshirish, patentlar, dori vositalari va tibbiy buyumlarni ro‘yxatga olish, jamoat transporti harakati, yer resurslaridan foydalanish va boshqa umumfoydalanishdagi statistik ma’lumotlar onlayn rejimda joylashtirib borilishi ta’minlanadi;
2021-yil 1-avgustdan boshlab jismoniy va yuridik shaxslarga barcha belgilangan davlat bojlari, yig‘imlar, jarimalar va boshqa majburiy to‘lovlarni elektron to‘lov tizimlaridan foydalangan holda onlayn rejimda to‘lash imkoniyati taqdim etiladi;
b) raqamli industriyani rivojlantirish bo‘yicha:
2020-yil 1-noyabrdan boshlab Dasturiy mahsulotlar va axborot texnologiyalari texnologik parki rezidenti maqomini axborot texnologiyalariga o‘qitish, apparat-dasturiy vositalarni ishlab chiqish va realizatsiya qilish, robototexnika, Internet tarmog‘i orqali axborot xizmatlarini eksport qilish, shuningdek, ma’lumotlarni saqlash va hisoblab qayta ishlash sohasida xizmat ko‘rsatadigan O‘zbekiston Respublikasi rezidenti hisoblangan yuridik shaxslar olishi mumkin bo‘ladi;
2022-yil 1-yanvarga qadar masofadan kredit mahsulotlarini realizatsiya qilish, omonatlar va hisob raqamlarni ochishni o‘z ichiga olgan keng turdagi onlayn xizmatlar ko‘rsatishni ta’minlash orqali tijorat banklarining raqamli transformatsiyasi yakuniga yetkaziladi;
v) raqamli ta’limni rivojlantirish bo‘yicha:
2021-yil 1-yanvardan boshlab fuqarolar tomonidan tizim boshqaruvi, ma’lumotlar bazasi va «bulutli» platformani boshqarish, axborot xavfsizligini ta’minlash va boshqa talab yuqori bo‘lgan yo‘nalishlarda xalqaro IT-sertifikatlarni olish xarajatlarining 50 foizgacha bo‘lgan qismini qoplash tizimi joriy etiladi;
2021-yil 1-sentabrga qadar har bir tuman va shaharda mavjud infratuzilma obyektlari negizida keng aholi qatlamlari, ayniqsa yoshlar va ayollar uchun raqamli texnologiyalar o‘quv markazlari ochiladi;
2023-yil yakuniga qadar barcha tuman va shaharlarda o‘quvchilarning ijodiy rivojlanishi va kompyuter dasturlash asoslarini o‘rganishi uchun mavjud ta’lim muassasalari negizida 200 dan ortiq informatika va axborot texnologiyalarini chuqurlashtirib o‘qitishga ixtisoslashtirilgan maktablar bosqichma-bosqich tashkil etiladi;
g) raqamli infratuzilmani rivojlantirish bo‘yicha:
2022-yil yakuniga qadar har bir aholi punkti 10 Mbit/sdan kam bo‘lmagan ma’lumotlarni uzatish tezligidagi Internet tarmog‘iga ulanish imkoniyati bilan ta’minlanadi;
2022-yil 1-yanvarga qadar barcha mashhur sayyohlik joylari yuqori tezlikdagi Internet bilan ta’minlanadi.
9. Belgilab qo‘yilsinki, 2023-yildan boshlab, Strategiya erishilgan natijalar va maqsadli ko‘rsatkichlar hamda tegishli davr uchun raqamli texnologiyalarni yanada rivojlantirishning asosiy yo‘nalishlaridan kelib chiqib, Vazirlar Mahkamasi tomonidan alohida tasdiqlanadigan ikki yilga mo‘ljallangan dasturlar asosida amalga oshiriladi.
10. Axborot texnologiyalari va kommunikatsiyalarini rivojlantirish vazirligi hamda Innovatsion rivojlanish vazirligining 2021-yil 1-yanvardan boshlab quyidagilarni nazarda tutuvchi barcha uchun ochiq bo‘lgan mahalliy dasturiy mahsulotlar va IT-xizmatlar elektron platformasini yaratish to‘g‘risidagi takliflari ma’qullansin:
mahalliy IT-kompaniyalar va dasturiy mahsulotlar ishlab chiqaruvchilar hamda ularning mahsulotlari va xizmatlarining yagona ma’lumotlar bazasini shakllantirish, shuningdek, ularga o‘z mahsulotlarini ichki va tashqi bozorlarda ilgari surishda ko‘maklashish;
davlat organlari va tashkilotlarida axborot tizimlari va boshqa dasturiy mahsulotlarni joriy etish bo‘yicha rejalashtirilayotgan loyihalar to‘g‘risida ma’lumotlarni e’lon qilish;
mamlakatda raqamli iqtisodiyotni rivojlantirishning amaliy masalalarini hal qilish hamda axborot texnologiyalari sohasidagi qonun hujjatlarini takomillashtirish jarayonida samarali va ochiq muloqotni yo‘lga qo‘yish.
11. 2020-yil 1-noyabrdan boshlab yopiq binolarda aloqani tashkil etish maqsadida mobil aloqa operatorlari uchun ajratilgan radiochastota doirasida 500 mVt dan oshmaydigan quvvatda ishlaydigan baza stansiyalaridan foydalanishga ruxsatnomani rasmiylashtirish bo‘yicha talablar (tasniflangan obyektlar yaqinida o‘rnatiladigan mobil aloqa baza stansiyalari bundan mustasno) bekor qilinsin.
12. 2020-yil 1-noyabrdan boshlab mobil aloqa operatorlari uchun:
telekommunikatsiya qurilmalari va inshootlarining qurilish-montaj, rekonstruksiya, sinovdan o‘tkazish va integratsiya qilish ishlarini yakunlash hamda tijorat maqsadida foydalanishni yo‘lga qo‘yish, shuningdek, telekommunikatsiya qurilmalari va inshootlarining konstruksiyasini o‘zgartirish, mavjud qurilmalardagi hamda telekommunikatsiya liniyalari va inshootlaridagi uskunalarni kengaytirish bo‘yicha xabardor qilish tartibi joriy etilsin;
radioelektron qurilmalar, asbob-uskunalar va boshqa qurilmalarni O‘zbekiston Respublikasiga olib kirish ruxsatnomasini, sotib olish, o‘rnatish, loyihalash va qurish uchun ruxsatnoma olmasdan, belgilangan tartibda rasmiylashtirish huquqi berilsin.
13. Axborot texnologiyalari va kommunikatsiyalarini rivojlantirish vazirligi hamda Adliya vazirligining mazkur vazirliklar va ularning tasarrufidagi tashkilot va bo‘linmalar negizida quyidagilarni nazarda tutuvchi «Raqamli idora» loyihasini amalga oshirish bo‘yicha taklifiga rozilik berilsin:
a) 2022-yil 1-yanvarga qadar:
qog‘ozsiz elektron hujjat almashinuvi va ish yuritishni tashkil qilgan holda barcha ma’muriy tartib-taomillarni va operatsion jarayonlarni raqamlashtirish;
faoliyatning ochiqligi va shaffofligi hamda aholi punktlarida davlat xizmatlaridan foydalanishning kafolatlanganligini ta’minlash;
idoralararo elektron hamkorlik jarayonlarini avtomatlashtirish;
b) «Raqamli idora» loyihasini amalga oshirishning amaliy tajribasini boshqa davlat organlari va tashkilotlarida ularning faoliyati xususiyatlaridan kelib chiqqan holda joriy etish.
14. Elektron hukumat imkoniyatlarini yanada kengaytirish, aholi va tadbirkorlik subyektlari uchun qo‘shimcha qulayliklarni yaratish hamda raqamli texnologiyalardan keng foydalanishni ta’minlash maqsadida:
Elektron davlat xizmatlarini ko‘rsatishni yanada takomillashtirish bo‘yicha chora-tadbirlar dasturi 25-ilovaga muvofiq;
Davlat boji, yig‘im, jarima va boshqa to‘lovlarni to‘lash mexanizmlarini takomillashtirish bo‘yicha amaliy chora-tadbirlar rejasi 26-ilovaga muvofiq tasdiqlansin.
Axborot texnologiyalari va kommunikatsiyalarini rivojlantirish vazirligi mas’ul vazirlik va idoralar hamda mahalliy ijro etuvchi hokimiyat organlari bilan birgalikda mazkur Farmonga 25 va 26-ilovalarda nazarda tutilgan tadbirlarning sifatli va o‘z vaqtida bajarilishini ta’minlasin.
15. 2020-yil 1-noyabrdan boshlab barcha vazirlik va idoralar, mahalliy ijro etuvchi hokimiyat organlarida amaldagi rahbar o‘rinbosarlaridan biriga raqamlashtirish bo‘yicha o‘rinbosar (Chief Digital Officer) vakolatlari yuklatilsin va quyidagilar ularning ustuvor vazifalari etib belgilansin:
axborot tizimlari va resurslarini keng joriy etishni nazarda tutuvchi idoraviy raqamli transformatsiya dasturlarini ishlab chiqish va o‘z vaqtida amalga oshirish;
elektron davlat xizmatlarini mobil qurilmalar va elektron hamkorlikning boshqa shakllari orqali ko‘rsatishni yanada kengaytirish uchun zarur shart-sharoitlar yaratish;
idoralar faoliyatining ochiqligi va shaffofligini ta’minlash, Internet tarmog‘ida ochiq ma’lumotlarni va boshqa axborotlarni joylashtirib borish bo‘yicha choralar ko‘rish;
idoraviy raqamli infratuzilmaning axborot xavfsizligini, shuningdek, elektron ma’lumotlar va hujjatlarning himoyasini ta’minlash.
Raqamlashtirish bo‘yicha o‘rinbosarlarning tegishli yo‘nalishdagi faoliyatini muvofiqlashtirish Axborot texnologiyalari va kommunikatsiyalarini rivojlantirish vazirligiga yuklatilsin.
16. Shunday tartib o‘rnatilsinki, unga muvofiq «Raqamli O‘zbekiston — 2030» strategiyasida ko‘zda tutilgan loyihalarni o‘z vaqtida va keng ko‘lamda amalga oshirilishini ta’minlaganligi, shuningdek, axborot texnologiyalari va elektron xizmatlarni joriy etishni reyting baholash natijalariga ko‘ra vazirlik va idoralar, mahalliy ijro etuvchi hokimiyat organlarining rahbarlari va ularning raqamlashtirish bo‘yicha o‘rinbosarlariga har oyda ularning oylik maoshiga 30 foiz miqdorida ustama to‘lanadi.
Rahbarlar va ularning raqamlashtirish bo‘yicha o‘rinbosarlariga oylik ustama tayinlash to‘g‘risida qaror Axborot texnologiyalari va kommunikatsiyalarini rivojlantirish vazirligining xulosasi asosida qabul qilinadi.
17. Innovatsion rivojlanish vazirligi Axborot texnologiyalari va kommunikatsiyalarini rivojlantirish vazirligi bilan birgalikda har yili 1-dekabrga qadar raqamli iqtisodiyotni rivojlantirish yo‘nalishlarida ilmiy-tadqiqot va innovatsion loyihalarning maqsadli dasturlarini Fan va texnologiyalar bo‘yicha respublika kengashiga tasdiqlash uchun kiritib borsin hamda ushbu sohada alohida e’tiborni quyidagilarga qaratsin:
axborot texnologiyalari sohasidagi ustuvor yo‘nalishlar bo‘yicha fundamental va amaliy tadqiqotlarni olib borish;
iqtisodiyot tarmoqlarida virtual va to‘ldirilgan reallik, sun’iy intellekt, kriptografiya, mashina o‘rganishi, katta ma’lumotlarni tahlil qilish va «bulutli» hisoblash texnologiyalaridan foydalanish imkoniyatlarini o‘rganish va ularni amaliyotga tatbiq etish;
istiqbolli innovatsion ishlanmalar va startap-loyihalarini amalga oshirish hamda ularni tijoratlashtirish va texnologiyalar transferini qo‘llab-quvvatlash.
Belgilab qo‘yilsinki, maqsadli dasturlarni moliyalashtirish xarajatlari ilmiy faoliyatga oid davlat dasturlarini amalga oshirish uchun ajratilgan mablag‘lar doirasida, shuningdek, Innovatsion rivojlanish va novatorlik g‘oyalarini qo‘llab-quvvatlash jamg‘armasi hamda Axborot-kommunikatsiya texnologiyalarini rivojlantirish jamg‘armasi mablag‘lari hisobidan qoplanadi.
18. Mazkur Farmonda belgilangan chora-tadbirlarning sifatli va o‘z vaqtida bajarilishini muvofiqlashtirish va monitoring qilishning quyidagi tartibi o‘rnatilsin:
a) vazirlik va idoralar, mahalliy ijro etuvchi hokimiyat organlarining raqamlashtirish bo‘yicha rahbar o‘rinbosarlari — har oyda hisobot oyidan keyingi oyning 5-sanasiga qadar Axborot texnologiyalari va kommunikatsiyalarini rivojlantirish vazirligiga ushbu Farmon bilan tasdiqlangan Strategiya, dasturlar va «yo‘l xarita»lari hamda idoraviy raqamli transformatsiya dasturlarida nazarda tutilgan chora-tadbirlarni amalga oshirish to‘g‘risida hisobot taqdim etadilar;
b) axborot texnologiyalari va kommunikatsiyalarini rivojlantirish vaziri Sh. Sadikov:
mas’ul vazirlik va idoralar faoliyatini idoralararo muvofiqlashtiradi, ularning faoliyatida raqamli texnologiyalarni joriy etish holatini baholaydi hamda muntazam ravishda raqamlashtirish bo‘yicha rahbar o‘rinbosarlarining hisobotlarini eshitishni tashkil etadi;
har oyda hisobot oyidan keyingi oyning 15-sanasiga qadar ushbu Farmon bilan tasdiqlangan Strategiya, dasturlar va «yo‘l xarita»lari hamda idoraviy raqamli transformatsiya dasturlari ijrosi to‘g‘risida umumlashgan tahliliy ma’lumotlarni Vazirlar Mahkamasiga kiritadi;
v) O‘zbekiston Respublikasi Bosh vazirining maslahatchisi — IT-texnologiyalar, telekommunikatsiyalar va innovatsion faoliyatni rivojlantirish masalalari departamenti boshlig‘i O. Umarov:
Strategiyaning maqsadli ko‘rsatkichlariga erishish ustidan tizimli nazoratni tashkil etadi, shuningdek, Muvofiqlashtiruvchi komissiya yig‘ilishlarida mas’ul vazirlik va idoralar rahbarlarining raqamlashtirish sohasidagi faoliyatini tanqidiy ko‘rib chiqish bo‘yicha takliflar kiritadi;
har chorakda O‘zbekiston Respublikasi Bosh vaziriga raqamlashtirish bo‘yicha rahbar o‘rinbosarlarining faoliyati natijadorligidan kelib chiqib, ularni rag‘batlantirish yoki intizomiy, shu jumladan egallab turgan lavozimidan ozod qilishgacha bo‘lgan choralarni ko‘rish bo‘yicha takliflarni kiritadi.
19. O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi, O‘zbekiston Milliy axborot agentligi va O‘zbekiston Milliy teleradiokompaniyasi ushbu Farmonning maqsad va vazifalarini ommaviy axborot vositalarida keng yoritish bo‘yicha ishlarni tashkil etsin.
20. Axborot texnologiyalari va kommunikatsiyalarini rivojlantirish vazirligi manfaatdor vazirlik va idoralar bilan birgalikda ikki oy muddatda qonun hujjatlariga ushbu Farmondan kelib chiqadigan o‘zgartirish va qo‘shimchalar to‘g‘risida Vazirlar Mahkamasiga takliflar kiritsin.
21. Mazkur Farmonning ijrosini nazorat qilish O‘zbekiston Respublikasining Bosh vaziri A.N. Aripov va O‘zbekiston Respublikasi Prezidentining maslahatchisi R.A. Gulyamov zimmasiga yuklansin.
|
| |
