5.4. Radiatsion, magnit va elektromagnit usullari
Materiallarning fizik-mexanik xossalarini va qurilish konstruksiyalarining nuqson (defekt)larini aniqlashda radiatsion usullardan ham foydalaniladi. Bular orasida rentgen usuli, elektron tezlatkichlаrning tormozli nurlanish usuli va γ — usullar amaliyotda eng ko'p tarqalgan usullardan hisoblanadi. Ushbu usullar o'zaro o'xshash masalalarni yechishda qo'llaniladi. Pozitronlardan foydalanishga asoslangan radiografiya usuli va issiqlik neytronlari orqali yorituv usullari istiqbolli usullar sanaladi. Neytronlar yordamida materialning namligi, pozitronlar orqali esa materialdagi charchash kuchlanishlarini aniqlash mumkin.
Rentgen, elektron tezlatkichlarning tormoz nurlanishi va γ — nurlanishlar o'z tabiatiga ko'ra, vakuumda yorug’lik tezligida tarqaladigan
yuqori chastotali elektromagnit to'lqinlaridir. 0,5 dan 1000 keV gacha bo'lgan
diapazonda ishlaydigan rentgen apparatlari bularning manbai vazifasini o'taydi.
Qatlamning yoritish chegarasi: metall uchun — 100, beton uchun- 350,
plastmassa uchun — 500 mm ni tashkil etadi. Yuqori energiyali tormozli
ionlashgan nurlanish uchun 35 MeV gacha bo'lgan diapazonda elektron
tezlatkichlari manba vazifasini o'taydi. Ularning yordamida po'latni — 450, betonni-2000 mm gacha bo'lgan qalinlikda yoritish mumkin. γ —
nurlanishlarning manbalari radioaktiv izotoplar bo'ladi. Bunda yoritiladigan
qatlam metall uchun — 100, beton uchun — 300, plastmassa uchun — 500
mm gacha bo'lgan qalinlikda bo'lishi mumkin.
Radioaktiv moddalarni qo'llash hamda ionlashgan nurlanish bilan bog'liq bo’lgan ishlar tegishli me'yoriy hujjatlar bilan tartibga solinadi. Barcha ishlar qat’iy yo'riqnomalar asosida bajariladi. Sanitar qoidalariga binoan yoshi 18 ga to'lmaganlar nurlanish bilan bog’liq bo'lgan ishlarga qo'yilmaydi. Radioaktiv moddalar bilan ishlaydigan xodimlar muntazam ravishda tibbiy ko'rikdan o'tkazib turiladi; mehnatni tashkil etishning xavfsiz usullari, hamda vositalari va shaxsiy gigiyena qoidalari bo'yicha imtihon qilinadi. Vaqti-vaqti bilan radiometrik nazorat amalga oshiriladi.
Nazorat-tekshiruvning magnitoviy usullari nuqson (defekt)lar ustida magnit maydonining sochilish qonuniyatini o'rganishga hamda sinalayotgan buyumning magnitli xossalarini aniqlashga asoslanadi. Magnitli usullarning, o'zi magnit kukunli, magnitografik, ferrozond, induktsion va pandermotor deb nomlangan alohida shoxobchalarga ajraladi.
Magnit kukunli usul metalldagi yaxlitlikning buzilishi singari nuqsonlarni aniqlashda eng ko'p tarqalgan usullardan sanaladi. Mazkur usul faqat ferromagnit materiallardan ishlangan buyumlarni sinashda qo'llaniladi. Bu usul buyumni yemirmagan holda undagi nometall aralashmalarni, bo'shliqlarni, yoriqlarni, payvand nuqsonlarini aniqlash imkonini beradi.
Magnit oqimi nuqsonsiz joyda o'z yo'nalishini o'zgartirmaydi. Agar magnit oqimi o'z yo’lidagi ochiq (a) yoki (b) nuqson tufayli kuchsizlansa,
u holda magnit yo'llarining bir qismi detaldan tashqariga chiqadi. Nuqsonning ustida magnit maydoni paydo bo'ladi (13-rasm).
13-rasm. Nuqson (defekt) ustida magnit maydoni hosil bo’lish sxemasi
Magnit kukunli usul yordamida juda kichik o'lchamdagi yoriqlar va boshqa nuqsonlarni aniqlash mumkin. Bu usul orqali kengligi 0,001 mm, chuqurligi 0,01 mm gacha bo'lgan yoriqlarni aniqlasa bo'ladi.
Ferrozond usuli magnit maydoni kuchlanganligini elektr signallariga o'zgartirishga, ya'ni Xoll effektiga asoslangan. Mazkur usuldan qurilish konstruksiyalarida uchraydigan nuqsonlarni aniqlashda foydalaniladi. Xoll effektining mohiyati shundan iboratki, agar yarimo'tkazgich materialdan tayyorlangan to'g'ri to'rtburchakli plastinkani kuchlanganlik vektoriga tik ravishda magnit maydoniga joylashtirib, uning ikki qarama-qarshi qirralari yo'nalishida tok o'tkazilsa, uning qolgan ikki qirrasida magnit maydoni kuchlanganligiga proporsional ravishda EYuK hosil bo'ladi. Elektr signallarining o'zgarishiga qarab, detalda nuqson bor-yo'qligi aniqlanadi
Induksion usuldan foydalanib, metall de- tallardagi yoriqlar, pay- vand choklardagi chala joylar, keraksiz qo'shil- malar aniqlanadi. Bunda tekshirilayotgan magnitlangan metalldagi sochilish maydonini aniqlash masalasi, o'zga- ruvchan tokda ishlay- digan o'zakli g'altakdan foydalanish orqali hal etiladi. G'altak elektr-magnit yo'liga o'rnatiladi. Nuqson topilganda oqimda yuz beradigan sochilish EYuK uyg'otadi, uni kuchaytirib, tovush signallariga o'zgartiriladi yoki o'ziyozar ostsillograflarga uzatiladi.
14-rasm. Magnitometrik asboblar:
a) qoplama qalinligini o'lchaydigan ITP — 1 asbobi;
b) kuchlanish va yoriqlarni o'lchaydigan INT — M2 asbobi;
d) armatura parametrlarini o'lchaydigan IPA asbobi.
Pandermotor usuli oichanayotgan magnit maydoni bilan asbobning magnit maydoni orasidagi bog'lanishga asoslanadi. Bu usul temiryo'l nuqsonlarini aniqlashda keng qo'llaniladi.
Magnit usuli ferromagnit asosga ega bo'lgan magnitsiz yopma (qoplama)ning qalinligini aniqlashda yoki asos bilan yopmaning magnitoviy xossalari keskin farq qilgan hollarda qo'llaniladi. Qo'yilgan masalani hal etish uchun doimiy magnitli va elektromagnitli asboblardan foydalaniladi. Magnit usullari yordamida materiali ferromagnit bo'lgan konstruksiya elementlaridagi kuchlanish holatini ham aniqlasa bo'ladi.
Kuchlanishlarni aniqlashda magnitoviy belgilar usuli ham qulay usullardan sanaladi. Elementga uning deformatsiyalanishidan oldin tashqi magnit maydoni orqali ma'lum masofada belgi (metka)lar qo'yib chiqiladi. Element deformatsiyalanganida belgilar orasidagi masofalar o'zgaradi. Masofa o'zgarishiga qarab deformatsiyaga va o'z navbatida, kuchlanishga baho beriladi.
Temirbeton konstruksiyalarida himoya qatlamining qalinligi va armatura diametrini magnit usulida oson va qulay aniqlanadi.
Magnit kuchi ta'siriga asoslangan asboblardan yana bir toifasi magnitometrik asboblar guruhini tashkil etadi (15-rasm). Bu toifadagi asboblar metalldagi yoriqlarni, metallarni zanglashdan asrovchi qoplamalar va betonning himoya qatlami qalinligini, armaturaning joylashuvini va,
eng muhimi, metall konstruksiyalarning kuchlanish holatlarini aniqlaydi.*
Metall qoplama qalinligini o'lchaydigan asbob ITP — 1 (измеритель толщины покрытия) doimiy magnitning metall tortishuv kuchi bilan qoplama qalinligi orasida bog'liqlik mavjudligiga asoslanadi. Asbobning qo'zg'aluvchi qismini burash orqali uning prujinasi cho'ziladi va metalldan ajralish holatiga keltiriladi. Asbobning ko'rsatkichlari qoplama qalinligiga moslashtirilgan.
Metalldagi kuchlanishlarni o'lchaydigan asbob INT — M2 elastik magnit effektiga, ya'ni magnit o'tuvchanligini metalldagi maksimal kuchlanish qiymatiga bog'liqligiga asoslanadi. Yoriqlarning mavjudligi sochilgan elektr magnit maydoni miqdoriga qarab aniqlanadi va o'lchanadi.
Armaturaning himoya qatlami qalinligini va o'rnashgan o'rnini o'lchaydigan 1PA asbobi armatura yaqinida bo'lgan uzatkichning magnit qarshiligi o'zgarishiga asoslanadi. Datchik armatura o'qi bo'ylab o'rnatiladi. Asbobdagi etalon sterjenni qo'zg'atish yo'li bilan indikatorda eng kichik ko'rsatkichga erishiladi. Himoya qatlami etalon sterjen bilan asbobning magnit kallagi orasidagi masofaga teng bo'ladi.
Magnit usullaridan foydalanishda, ayniqsa, elektr quvvati qo'llaniladigan ishlarda, xavfsizlik texnikasi qoidalariga qat'iy amal qilish talab etiladi. Barcha asboblar yerga ulangan bo'lishi shart. Shuni alohida qayd etish lozimki, 24 voltli elektr manbai kishi organizmi uchun xavf tug'dirishi mumkin. Asboblar yaqinida oson alangalanuvchi moddalarni saqlash man etiladi. Magnit kukuni bilan ishlaganda qo'lni asrash uchun biologik qo'lqop kiyish tavsiya etiladi. Xavfsizlik texnikasiga oid talablar maxsus yo'riqnoma (instruksiya)larda batafsil bayon etilgan.
Takrorlash uchun savollar:
Yemirilmaydigan sinash usullari qanday turlarga bo’linadi?
Siqilgan havodan foydalanish va vakuum usuli bilan sinash qanday amalga oshiriladi?
Yemirilmaydigan mexanik sinov usullariga nimalar kiradi?
Qattiqlikni Brinel bo’yicha aniqlash qanday olib boriladi?
Kashkarov bolg’asining ishlash sxemasini chizib bering.
Konstruksiyalarni akustik usulda sinash qanday olib boriladi?
Materiallarni radiatsion usulda sinash deganda nima tushuniladi?
Materiallarni magnit va elektromagnit usullarda sinashning ishlash prinsplari nimaga asoslangan?
|
