| Qoraqalpoq do’ppilari
Qoraqalpoq do’ppilari asosan gumbazsimon shaklda bo’lib, tepa qismi to’rt bo’lakda, mayda qaviqlar orqali birlashtirilib tayyorlanadi. Do’ppilar astariga paxta tolasidan tayyorlangan mato elimlanadi. Kizagiga jiyak tikilib, ipak iplardan tayyorlangan popuk qadab bezatiladi. Popuklar erkaklar do’ppisiga bir dona, qizlar do’ppisiga bir necha dona qadaladi. O’smir yigit-qizlar asosan ko’k, yashil rangli duxobadan tayyorlangan do’ppilarni kiyishsa, keksa chollar, yosh bolalar esa Qoraqalpoq milliy kashtasining mayda, nozik o’ziga xos nashqlar kompozistiyasini tashkil etuvchi hamda kanvasiz rangli, yarim iroqi kashta usulida tayyorlangan do’ppilarni yaxshi ko’rib kiyishadi.
Qoraqalpoq do’ppilari asosan mahalliy dastgohlarda to’qilgan matolar hamda fabrika matolaridan tayyorlanadi. Bunday do’ppilar “toqima taqya» yoki duxobadan tayyorlangani “maqpal taqya” deb yuritiladi. Rombsimon hamda “qo’chqorshoxi” deb ataluvchi kashta naqshlari tikilgan do’ppilar esa “kozba taqya” deb ataladi.
|
