Samarqand do’ppilari
Samarqandda ko’rinishi to’rt tomonli, tepasi baland, gumbazsimon, kizagi keng, kizagining chetiga enli to’q rangli matodan jiyak qadalgan do’ppilarni erkaklar kiyishgan. Bu kabi do’ppilar qora satin, ipak matoga tepa va kizagiga ko’pincha qo’l kashta chokining «ko’ptirma» usulida kashta tikib, tayyorlangan. Kashtalar asosan rangli ipak iplar bilan tikilib, tepa qismining to’rt tarafi va kizagiga bir xil mutanosib naqsh - gul tanlangan. Samarqandda urgut do’ppilari har davrda o’ziga xos nafisligi, mukammalligi bilan ahamiyat kasb etadi.
Ko’rinishi dumaloq, kizagi baland bunday do’ppilar “piltado’zi” texnikasida qora satindan tayyorlanib, “kanda xayol”, “yo’rma” qo’l chokida rangli ipak yoki paxta iplar bilan kashta tikiladi. Kizagiga popuk qadalib bezatiladi. Do’ppi kashtasi uchun gul va geometrik naqshlar tanlanadi. Yosh bolalar uchun mo’ljallangan xuddi shunday do’ppilarning gullari orasiga yaltiroq metall “bargak”lar va munchoqlar qo’shib bezatiladi.
|
