1. AXBOROT KOMMUNIKATSIYA TEXNOLOGIYALARINING MOHIYATI VA NAZARIY JIHATLARI
-
Axborot kommunikatsiya texnologiyalarining mohiyati va ularning korxona faoliyatidagi o’rni
Jahon bozorida barcha mamlakatlar XXI asrda bevosita “industrial jamiyatdan” “axborotlashgan jamiyatga” o’tishni boshladi. Muqarrarki, jahon iqtisodiyotining kelajagini, tabiiy boyliklar bilan bir qatorda (neft, gaz, ko’mir, metallar va h.k.), axborot omillari belgilaydi, axborot sohasini rivojlanish birinchiligida esa jahon doirasida kuchlarni joylashtirilishi muhim ahamiyatga ega bo’ladi. Axborotlashgan jamiyatda axborot borgan sari strategik manbaaga aylanmoqda. Kuchli, raqobatdosh iqtisodiyotlarni, shuningdek dunyoning barcha qismlarda industriyalashtirishdan so’ngi va bozor iqtisodiyotida yangi jarayonlar paydo bo’lishi global iqtisodiyot miqyosini kengaytirdi.
Dunyo bo’yicha axborot tarmoqlari, kapital, ish kuchi va bozor tarmoqlari texnologiyalar, foydali vazifalar, odamlar va xududiy yaqinlik bilan bog`lanmoqda. Ushbu jarayonlar axborotni bosh manbaa sifatida asoslantiradi. Axborot iqtisodiy omil bo’lib qoldi va axborot sohasiga sarmoyalar doimiy ravishda muntazam oshib bormoqda. Ana shulardan kelib chiqib O’zbekiston hukumati axborotlashgan jamiyat shakllanishi va ushbu sohani iqtisodiy rivojlanish hamda aholi farovonligi darajasini oshirishning strategik yo’nalishi sifatida belgilab oldi. Ayniqsa axborot texnologiyalar o’rni zamonaviy bozor iqtisodiyotida katta ahamiyatiga ega.
Axborot texnologiyalar iqtisodiyot tarmoqlarida ishni samarali tashkil qilish bilan bir qatorda, soha tomonidan taqdim etilayotgan xizmatlar spektorini kengaytirish va sifatini oshirishda faol tadbiq etilib ishlatilmoqda. Ular iqtisodiyotning ko’pgina sohalarida katta ahamiyatga ega bo’lmoqda. Ayrim kompaniyalar va milliy iqtisodiyotlar raqobatdoshligi, davlatning mahalliy va chet el sarmoyadorlar uchun qulayligi ko’p jihatdan axborot infratuzilmasi va axborot xizmatlarining rivojlangan darajasiga bog`liq. Milliy axborot manbalari iqtisodiyot va jamiyat rivojlanishning eng zaruriy tarkiblarning biriga aylandi, u borgan sari ayrim davlatlarning global raqobatdoshlik darajasini belgilab beradi.
Mazkur izlanishning dolzarbligi, birinchi navbatda, korxonalarda axborot texnologiyalarni o’rni oshganligi hisoblanadi. Korxonalar faoliyatini islohotlashtirish va ularni ho’jalik ishlarini olib borishda bozor usullariga o’tish davrida davlat va korxonalari o’zlari ham, axborot texnologiyalarni qo’llash sohasidagi iqtisodiy jihatdan rivojlangan davlatlarning keng tajribasini hisobga olishlari lozim. Bugungi kunda korxona faoliyatini samaradorligini oshirish va sog`lom raqobatdosh kurashish, axborot texnologiyalar sohasidagi zamonaviy texnologiyalar xizmatlaridan foydalanmasliksiz tasavvur qilish qiyin.
Axborot kommunikatsiya texnologiyalari (AKT) shaxsiy, ommaviy va ishlab chiqarish kommunikatsiyalari yordamida axborotni tayyorlash, qayta ishlash va etkazib berish bilan bog`liq obyektlar, xatti-harakatlar va qoidalar majmuini, shuningdek sanab o’tilgan jarayonlarni integral ravishda ta’minlaydigan barcha texnologiyalar va sohalarni bildiradi.
Jahon tajribasi axborot kommunikatsiya texnologiyalarining mamlakat ijtimoiy-iqtisodiy rivojlanishiga asosan ijobiy ta’sirini tasdiqlaydi. Geografik va vaqt to’siqlarini buzib o’tib, axborot kommunikatsiya texnologiyalari jahondagi har bir kishi bilan onlayn rejimida aloqa bog`lash va ma’lumotlar olish imkonini beradi, ijtimoiy-iqtisodiy xatti-harakatlarning global mobilligini oshiradi.
AKTning tarqalishi globallashuv sharoitida axbortlashtirishning rivojlanish sur’atlarini, xalqaro kapital harakatini tezlashtiradi, butun dunyoda axborot tarmoqlari vositasida xizmat ko’rsatish sohasi yanada kengayib boradi. Jahonning bir qator taraqqiy etgan mamlakatlarida axborot kommunikatsiya texnologiyalari sohasi ushbu mamlakatlar hukumatlari tomonidan ustuvor yo’nalish sifatida ajratib ko’rsatilgan va o’zining rivojlanish sur’atlari bo’yicha iqtisodiyotning boshqa sohalaridan ilgarilab ketgan. Hozirgi zamon sharoitida AKT sohasining rivojlanish darajasi, aholi boshiga AKT sarflari, Internetdan foydalanish va uni joriy etish darajasi alohida mamlakatlar va umuman jahon ijtimoiy-iqtisodiy taraqqiyotining asosiy omillaridan hisoblanadi.
Axborot kommunikatsiya texnologiyalarning ulkan potensialidan to’liq hajmda foydalanish biznes, alohida shaxslar va butun jamiyatni qamrab olgan har tomonlama iqtisodiy islohotni amalga oshirishning ustuvor yo’nalishlarini belgilab beradi, chunki AKT alohida fuqarolarning hayoti va faoliyatiga va umuman mamlakatimiz infrastrukturasiga faol kirib bormoqda. Bu yo’nalishlar quyidagilardir:
- davlat va siyosiy boshqaruv;
- ta’lim va ilm-fan;
- sog`liqni saqlash va tibbiyot;
- telekommunikatsiyalar va ommaviy axborot vositalari;
- biznes va savdo;
- madaniyat va san’at;
- ishlab chiqarish.
AKTning davlat boshqaruviga joriy etilishi iqtisodiyot rivojlanishini tezlashtirish, davlat sektoriga sarflarni qisqartirish yo’li bilan mehnat unumdorligini va davlat boshqaruvi samaradorligini oshirish imkonini beradi, davlat hokimiyati va boshqaruvi organlarining fuqarolar va xo’jalik yurituvchi sub’ektlar bilan o’zaro aloqasini takomillashtiradi.
AKTlar kichik biznes va shaxsiy tadbirkorlikka ham mehnat unumdorligini, huquqiy savodxonlikni oshirish uchun noyob imkoniyat yaratadi. Biznes bilan yoki iste’mol mollarini sotib olish bilan shug`ullanayotgan fuqarolarning AKT orqali bozor narxlari va tovarlarning sifatlari to’g`risidagi axbrotga keng kirib borish imkoniyatlariga ega ekanliklari ularga ratsional tijoriy qarorlar qabul qilish va samarali iste’molchilik tanlovini amalga oshirishga yordam beradi. Biznes bilash shug`ullanuvchilar uchun yangi kompyuter modellarining maxsus yaratilishi va rivojlantirilishi Internet vositasida olib boriladigan savdoning misli ko’rilmagan ekspansiyasiga sabab bo’lmoqda. An’anaviy chegaralarni buzib o’tgan misli ko’rilmagan darajada ko’p biznes turlarining rivojlanishi tufayli pul va xizmatlarni tez va arzon taklif etish imkoni tug`ildi. Shuni ta’kidlash lozimki, AKTdan foydalanish biznes sohasida bitimlar samaradorligining takomillashuviga katta hissa qo’shdi. Masalan, Yaponiyada shunday katta va qulay magazinlar tarmoqlari faoliyat ko’rsatadiki, ularda tovarlarga bevosita uydan yoki ofisdan turib, nafaqat telefon orqali, balki Internet orqali ham buyurtma berish mumkin.
Hozirgi zamon sharoitida ko’pchilik korxona rahbarlari axborot kommunikatsiya texnologiyalaridan foydalanishga korxona faoliyati samaradorligini maksimal darajada oshirish instrumenti sifatida qaramoqdalar. Tashkilotlar esa qaror qabul qilish ishlarini soddallashtirish va operatsiyalarni amalga oshirish tezligini oshirish uchun elektron pochta va Internetga borgan sari ko’proq tayanmoqdalar. AKTdan uzoq muddat davomida foydalanish natijasida savdo menejmentining yangi turi bo’lgan tarmoqli taklif menejmenti vujudga keldi.
Marketingning bu turi barcha tovar bo’limlari va savdo bo’limlari, shuningdek ishlab chiqarish va ta’minot seksiyalari hamda ulgurji va chakana savdo nuqtalari o’rtasida mahsulot taqsimlash va axborot etkazib berishda eng qulay yo’llarni taqdim etadi. Hozirgi paytda AKT infratuzilmasini yaratish va qo’llab-quvvatlash, sherikchilik munosabatlarini rivojlantirish, axborot kommunikatsiya texnologiyalarini yanada rivojlantirish maqsadida zarur shart sharoitlarni ta’minlash uchun kadrlar tayyorlash ishiga juda katta mablag`lar sarflanmoqda. Bugungi kunda davlatlar, taraqqiyotni qo’llab-quvvatlash xalqaro institutlari, alohida donor tashkilotlar, xususiy sektor va ijtimoiy tashkilotlar jahon taraqqiyotida AKT rolini oshirish yo’lida hamkorlikda muhim va samarali xatti-harakatlarni amalga oshirmoqdalar. Ishlab chiqarish samaradorligini sezilarli darajada oshirish, yangi xizmatlarni rivojlantirish va mahalliy sharoitlardan optimal foydalanishda ulkan potenstialga ega bo’lgan zamonaviy axborot kommunikatsiya texnologiyalari davlat tuzilishini, xususan ijtimoiy, siyosiy, madaniy va iqtisodiy sohalarni takomillashtirishga ham ijobiy ta’sir ko’rsatmoqda. Demak, axborot kommunikatsiya texnologiyalari sohasini rivojlantirishning milliy strategiyasi bozor iqtisodiyotini yanada rivojlantirishda, O’zbekistonda demokratik tuzumni mustahkamlashda birinchi darajali vazifa bo’lib xizmat qiladi.
| 