1-mavzu. O‘quvchi ijodkorlik qobiliyatlarini rivojlantirish bosqichlari
Reja:
1. Ijodkorlik tushunchasining mohiyati.
2. Ijod turlari.
3. O‘quvchi texnik ijodkorlik qobiliyatlari bosqichlari.
1. Ijodkorlik tushunchasining mohiyati
Ijod – insonning yangi moddiy va ma’naviy ne’matlar yaratish faoliyati. Unda
inson tafakkuri, xotirasi, tasavvuri, diqqati, irodasi faol ishtirok etadi, butun bilimi,
tajribasi, iste’dodi namoyon bo‘ladi.
Ijod dastlab inson tasavvurida tug‘iladi, keyin
ijodga taalluqli masalalar
yuzasidan izlanishlar olib boriladi, boshqalar tomonidan
bajargan ishlar tanqidiy
ko‘rib chiqiladi, tahlil qilinadi. Kuzatishlar, tajribalar o‘tkaziladi, mantiqiy xulosalar
chiqariladi, gipotezalar qilinadi, tajribada sinab ko‘riladi. Noto‘g‘ri bo‘lsa
yangilanadi.
Izlanishlar natijasi turli shakllarda (tayyorlangan
buyumlar, badiiy asar,
matematik formula, va b.) yuzaga chiqadi. Uni jamiyat e’tirof
etsagina haqiqiy,
to‘liq ijod sanaladi. Ijod fan-texnikani, madaniyatni boyitadi va rivojlantiradi.
Odatdagi ijod tushunchasi ozchilik kishilarning buyuk san’at asarlarini, yangi
mashinalarni, dastgohlar va hokazolarni yaratadigan iste’dodli odamlarning
qismatidir. Lekin ijod buyuk asarlar
yaratishdan iboratgina emas, balki kishining
fikr
yuritishi, biror tadbirni o‘ylab topishi, ozgina bo‘lsa-da qandaydir yangilik
yaratishi ham ijoddir. Ijod jarayoniga
tasodif sifatida emas, balki muayyan
qonuniyatlar asosida amalga oshuvchi jarayon sifatida qarash lozim.
O‘quvchining ijodkorligi uning har qanday faoliyat jarayoni bo‘yicha
mustaqil fikrlashida namoyon bo‘lishi lozim.
