G‘azallaridan
* * *
Eltgin mening salomimni dildorga, ey sabo,
Arz aylagin payomimni ul yorga, ey sabo.
Sochgil binafsha sochlarni gul yonoq ustiga,
Taratgin mushki anbarni gulzorga, ey sabo.
Pinhonavor yorning eshigiga borsang agar,
Ko‘rsatma zinhor o‘zingni ag‘yorga, ey sabo.
Bechoraligimni mening ul yorga bayon qil,
Shoyadki topar dardimga bir chora, ey sabo.
Vuslat mayiga yetmas qo‘lim, notavonman,
Qancha taxammul aylaram ul xorga, ey sabo.
Degilki, Ahmadiyga necha zahmat berarsan
Ayyor, g‘amzali ko‘zi makkorga, ey sabo.
| 