Eritma 2 xil tayyorlanishi mumkin:
1. Steril ulchov kolbasiga 250g analgin aseptik sharoitda tortib olib solinadi. Ustiga
in’yeksiya uchun ishlatiladigan suvdan solib eritiladi va eritma hajmi 1 litrga yetkaziladi.
2. O’lchov kolbasi bo’lmaganda suv miqdori eritmaning zichligiga ko’ra hisoblab topiladi.
25% li analgin eritmasining zichligi 1,080 g / ml. Bundan 1 litr eritma og’irligi:
1000ml x 1,080 g/ml = 1080 g
In’yeksiya uchun ishlatiladigan suvning miqdori:
1080 g — 250g = 830 ml
Steril yordamchi idishga 250 g analgin va 830 ml in’yeksiya suvi solib eritiladi.
Erituvchi miqdorini dori moddasining hajm oshish koeffitsiyenti (HOK) orqali ham
hisoblash mumkin. Analginning HOK 0,68 ga teng. Bundan, 250 g analgin suvda eriganda eritma
hajmi 170 ml (250 x 0,68) ga ortadi. Demak, in’yeksiya uchun ishlatiladigan suvning miqdori:
1000 ml —170 ml = 830 ml bo’lishi kerak.
Tayyor eritma steril filtrlanib, 10 ml hajmdagi idishlarga qadoqlanadi. Idishning og’zi
rezinka probka va alyumin qopqoq bilan zich qilib berkitiladi. Mexanik zarrachalar bor-yo’qligi
tekshirilib, so’ng avtoklavda 120°C haroratda 8 daqiqa davomida sterillanadi. Yana qaytadan
mexanik zarrachalar bor-yo’qligi tekshirilib, tegishli yorliq yopishtiriladi. Eritmaning yaroqlilik
muddati 30 kun bo’lib, u qorong’i va salqin joyda saqlanishi lozim.
