Ultrabənövşəyi şüalanmalardan mühafizə üçün ümumi və fərdi mühafizə yolları və
vasitələrindən istifadə edilir. Bunlara misal: iş yerlərinin və şüalanma mənbələrinin
ekranlanması, işçilərin ultrabənövşəyi şüalanma mənbələrindən uzaqlaşdırılması (uzaqdan idarə
etmə), iş yerlərinin səmərəli yerləşdirilməsi və otağın divarlarının xüsusi rənglənməsi, fərdi
mühafizə vasitələrindən və kremlərdən istifadə edilməsini göstərmək olar.
İş otaqlarının divarlarının rənglənməsi üçün açıq tonlu rənglərdən (boz. sarı, mavi) istifadə
edilir; ultrabənövşəyi şüalanmaları udan sink və titan ağ rənglərinə üstünlük verilir.
Ultrabənövşəyi şüalanmalardan fərdi mühafizə vasitələrinə istilikdən mühafizə edən
xüsusi üst geyimləri, əlcəklər, xüsusi ayaqqabı, mühafizə kaskası, işıq süzgəcli eynək və s.
göstərmək olar.
Dərini ultrabənövşəyi şüalanmadan mühafizə etmək üçün xüsusi kremlərdən istifadə edilir
ki, bu kremlərin tərkibində işıq süzgəci rolunu oynayan xüsusi maddələr vardır (məsələn, salol,
salisil-metil efiri və s.)
İş yerlərində ultrabənövşəyi şüalanmaların intensivliyini və spektrini ölçmək üçün
ufdozimetr cihazlarından və spektrometrlərdən istifadə edilir.
