|
I. Termodinamikaning birinchi qonuni va asosiy tushunchalar
|
| bet | 2/22 | | Sana | 12.12.2023 | | Hajmi | 131,05 Kb. | | #117032 |
Bog'liq Qarshi davlat universiteti berdimurodov e. T. Fizikaviy kimyo fa-hozir.org техника хавфсизлиги хизмати, 1. Sohadagi yangiliklar mavzusida matn tuzish-fayllar.orgI. Termodinamikaning birinchi qonuni va asosiy tushunchalar
I.1. Asosiy tushunchalar
Termodinamik sistema moddiy borliqning haqiqiy yoki xayoliy chegara sirt bilan ajratilgan makroskopik qismidir. Termo-dinamika juda ko‘p zarrachalardan iborat bo‘lgan sistemalarni o‘rganadi. Alohida molekulalar, atomlar yoki elementar zarracha-larga nisbatan termodinamikani qo‘llab bo‘lmaydi. Agar sistema-ning tashqi muhit bilan hech qanday o‘zaro ta’sirlanishi bo‘lmasa, bunday sistema izolyatsiyalangan (tashqi muhitdan ajratilgan) deyiladi. Agar chegaradan modda almashinishi kuzatilsa, unda sistema ochiq bo‘ladi, aks holda, ya’ni hech qanday modda chegara orqali o‘tmasa, unda yopiq sistema deyiladi. Izolyatsiyalangan sistemadan farqli ravishda yopiq sistema tashqi muhit bilan energiya almashishi mumkin.
Agar sistema barcha nuqtalarda bir jinsli bo‘lsa, u gomogen deyiladi, aks holda fazalar haqida so‘z yuritiladi. Bir necha fazalardan tuzilgan sistema geterogen deyiladi. Sistemaning boshqa qismlaridan sirt chegarasi bilan ajratilgan gomogen sistemaning bir jinsli gomogen material qismlarning to‘plamiga faza deyiladi. Sistemani tavsiflovchi fizikaviy va kimyoviy xossalarning to‘plami sistemaning holatidir. Termodinamik sistema holatning termo-dinamik parametrlari (Т,Р,V,С,U,S va boshqalar) bilan tavsiflanadi. Termodinamikaning asosiy qonunlarini tushunish va talqin qilishni ta’minlaydigan umumiy belgilariga qarab termodinamik parametrlar sinflarga birlashtirilgan. Son qiymatlari jihatdan doimiy kimyoviy tarkibli sistemaning massasiga proporsional bo‘lgan termodinamik parametrlar ekstensiv parametrlar deyiladi. Ekstensiv parametr-larga hajm (V), massa (m), elektr zaryadining miqdori (Z), ichki energiya (U), entropiya (S) va boshqalar misol bo‘ladi. Son qiymatlari jihatidan sistemaning massasiga bog‘liq bo‘lmagan parametrlar intensiv parametrlar deyiladi. Intensiv parametrlarga bosim, harorat, elektr zaryadining potensiali, solishtirma ekstensiv kattaliklar (moddaning birlik miqdori uchun olingan) hamda barcha umumlashgan kuchlar kiradi. Umumlashgan kuchlar va umumlash-gan koordinatalar ham termodinamik parametrlar bo‘lib, mexanik kuch (yoki bosim), elektr potensiali, kimyoviy potensial va boshqalar umumlashgan kuchlarga va geometrik koordinata, hajm, zaryad, ma’lum komponentning massasi umumlashgan koordinata-larga kiradi. Termodinamik parametrlardan hattoki bittasining o‘zgarishi bilan bog‘liq bo‘lgan sistemadagi har qanday o‘zgarish termodinamik jarayon deyiladi. Agar parametrning o‘zgarishi faqat boshlang‘ich va oxirgi holatlargagina bog‘liq bo‘lib, jarayonning yo‘liga bog‘liq bo‘lmasa, bunday parametr holat funksiyasi deyiladi.
Harorat – termometriyada aniqlanadigan obyekt, uni bevosita o‘lchab bo‘lmaydi, faqat issiqroq yoki sovuqroq jism haqida tushuncha hosil qilish mumkin. Harorat sistema zarrachalarining o‘rtacha kinetik energiyasi bo‘lib, jism qanchalik isitilganligining o‘lchovidir. U haroratga bog‘liq bo‘lgan boshqa fizikaviy parametr-larning son qiymatlari bo‘yicha aniqlanadi, bu esa, yuqorida ta’kidlaganimizdek, empirik harorat shkalalarini tuzishning asosi qilib olingan.
Issiqlik – moddaning harorati, massasi va tabiatiga bog‘liq bo‘lgan kattalik bo‘lib, alohida zarrachaning kinetik energiyasini belgilaydi. Sistemaga issiqlik berilganda, molekulalarning o‘rtacha kinetik energiyasi ortishi hisobiga, sistemaning harorati ortadi. Demak, issiqlik energiya uzatishning bir turidir. Sistemaga berilgan issiqlik har doim ham haroratni oshirmaydi. Masalan, muz suyuqlanayotganda yoki suv qaynayotganda sistemaga issiqlik berish haroratni o‘zgartirmaydi va jarayon doimiy haroratda boradi, bunda sistemadagi molekulalarning o‘rtacha kinetik energiyasi o‘zgarmasdan faqat potensial energiyasi ortadi. Ushbu issiqlik muzning kristall panjarasini buzishga yoki suvni bug‘lantirish jarayoniga sarflanadi (eski adabiyotlarda “yashirin issiqlik” deb atalgan).
Ish – bir sistemadan ikkinchi sistemaga energiya uzatishning yana bir turi bo‘lib, bunda ish bajarilayotgan sistemaning ichki energiyasi kamayadi, ta’sir qilinayotgan sistemaning energiyasi esa, bajarilgan ishga mos ravishda ortadi. Ish va issiqlik o‘zaro ekvivalentdir. Issiqlikning o‘lchov birligi kaloriya va ishning o‘lchov birligi joul deb qabul qilingan. 1kal.=4,1875 J teng bo‘lib, issiqlikning mexanik ekvivalenti deyiladi.
Ichki energiya – jism barcha zarrachalarining bir-biri bilan o‘zaro ta’sirlashish potensial energiyasi va alohida zarrachalar harakatining kinetik energiyalari yig‘indisidan tashkil topgan, ya’ni molekulalarning ilgarilanma va aylanma harakati energiyasi, molekulani tashkil qilgan atom va atom guruhlarining ichki molekulyar tebranma harakati energiyasi, atomlardagi elektron-larning aylanish energiyasi, atom yadrolaridagi energiya, molekula-lararo o‘zaro ta’sirlashish energiyasi va mikrozarrachalarga tegishli bo‘lgan boshqa turdagi energiyalardan iboratdir. Ichki energiya sistema energiyasining umumiy zaxirasi bo‘lib, uning tarkibiga to‘liq, bir butun sistemaning kinetik energiyasi va uning holatining potensial energiyasi kirmaydi. Jism ichki energiyasining absolyut qiymati ma’lum emas, uni to‘g‘ridan-to‘g‘ri o‘lchash ham mumkin emas. Sistema energiyasini bir butunligicha bevosita o‘lchaydigan hech qanday usullar mavjud emas. Ammo kimyoviy termo-dinamikani kimyoviy hodisalarni o‘rganishga qo‘llashda sistema bir holatdan ikkinchisiga o‘tayotgandagi ichki energiyaning o‘zga-rishini bilish kifoyadir. Ish yoki har qanday ko‘rinishdagi energiya intensivlik va ekstensivlik omillarining ko‘paytmasi sifatida ifodalanadi.
Issiqlik sig‘imi – sistemaning haroratini bir gradusga ko‘tarish uchun talab qilingan issiqlik miqdori bo‘lib, u sistemaga berilgan issiqlikning harorat o‘zgarishi nisbatiga teng. “Issiqlik sig‘imi” tushunchasining kiritilishi termodinamika tarixida eng katta yutuqlardan biri bo‘lgan.
Bosim – birlik sirt yuzasiga ta’sir qiluvchi kuch bo‘lib, turli birliklarda ifodalanadi: Paskal, n/m2, bar va mm.sim.ust. Bunda doimo sistema bosimining atmosfera bosimi bilan farqi emas, balki absolyut bosim ko‘rsatiladi.
Termodinamik sistema qandaydir boshlang‘ich holatdan chiqib, qator o‘zgarishlarga uchragandan so‘ng yana avvalgi holatiga qaytadigan jarayon aylanma yoki siklik jarayon deyiladi. Bunday jarayonda har qanday holat parametrlarining o‘zgarishi nolga tengdir. Jarayonning borish sharoitlariga qarab izobarik, izotermik, izoxorik, adiabatik jarayonlar bir-biridan farqlanadi, ular-da mos ravishda bosim, harorat, hajm yoki entropiyalar o‘zgarmas bo‘ladi. Adiabatik sharoitda sistema tashqi muhit bilan issiqlik almashmasligi sababli, termodinamikaning ikkinchi qonunidan entropiyaning o‘zgarmas bo‘lishi kelib chiqadi.
Atrof muhitda hech qanday o‘zgarishlarsiz sistemaning boshlang‘ich holatga qaytish imkoniyatini beruvchi jarayon qaytar (muvozanat) jarayon deyiladi. Xossalari (harorat, bosim, tarkib, elektr potensiali) vaqt o‘tishi bilan o‘z-o‘zidan o‘zgarmaydigan va alohida fazalarning barcha nuqtalarida bir xil qiymatga ega bo‘lgan sistemaning holatlari qaytar jarayonlar termodinamikasida ko‘rib chiqiladi. Sistemaning bunday holatlari muvozanat holatlar deyiladi. Muvozanat jarayonda sistema muvozanat holatlarning uzluksiz qatoridan o‘tadi va kvazistatik jarayon deb ham ataladi.
Harorat, bosim va fazalarning ichki tarkibi teng taqsimlan-magan va vaqt o‘tishi bilan o‘zgaruvchan bo‘lgan holatlar nomuvozanat holatlar deyiladi. Ular qaytmas (nomuvozanat) jarayonlar termodinamikasida ko‘rib chiqiladi va unga termo-dinamikaning asosiy qonunlaridan tashqari qator qo‘shimcha postulatlar kiritiladi. Jarayonning termodinamik jihatdan qaytar yoki qaytmasligini kimyoviy reaksiyalarning qaytarligi yoki qaytmasligi tushunchalari bilan chalkashtirmaslik kerak. Kimyoda ushbu atamalar to‘g‘ri va teskari yo‘nalishlarda borishi mumkin bo‘lgan har qanday reaksiyalarga qo‘llanishi mumkin bo‘lib, bunda sistemaning boshlang‘ich holatga qaytib kelishida atrof muhitdagi o‘zgarishlar e’tiborga olinmaydi.
|
| |
