VIII BOB. KOMPYUTER TARMOQ TURLARI VA
INTERNET TEXNOLOGIYALARI. AXBOROT
XAVFSIZLIGI
Tayanch soʻzlar: kompyuter tarmogʻi, tarmoq turlari, axborot
uzatish, tarmoq qurilmalari, topolagiya, simsiz aloqa tarmoqlari,
Internet, elektron pochta, axborot xavfsizligi, kompyuter virusi,
identifikasiya, autentifikasiya
8.1. Kompyuter tarmoq turlari
Kompyuterlar orasida ma’lumot almashish va umumiy
masalalarni birgalikda yechish uchun kompyuterlarni bir-biri bilan
bogʻlash ehtiyoji paydo boʻladi. Kompyuterlarni bir-biri bilan
bogʻlashda ikki xil usuldan foydalaniladi:
1. Kabel yordamida bogʻlash. Bunda kompyuterlar bir-biri
bilan koaksial, oʻrama juft kabeli yoki optik tolali kabellar orqali
maxsus tarmoq plata yordamida bogʻlanadi.
2. Simsiz bogʻlanish. Bunda kompyuterlar bir-biri bilan simsiz
aloqa vositalar yordamida, ya’ni radio toʻlqinlar, infraqizil nurlar,
WiFi, WiMax va Bluetooth texnologiyalari yordamida bogʻlanadi.
Bir-biri bilan bogʻlangan kompyuterlarning bunday majmuasi
kompyuter tarmogʻini tashkil etadi.
