1-bob. Umumiy qoidalar
1. Ushbu Reglament yuridik va jismoniy shaxslarga (keyingi o‘rinlarda
ariza beruvchilar deb
ataladi) tegishli bino va inshootlarning tashqi ko‘rinishini o‘zgartirishni kelishish tartibini belgilaydi
2. Ushbu Ma’muriy reglamentda quyidagi asosiy tushunchalardan foydalaniladi:
bino — funksional maqsadiga qarab odamlar yashashi yoki bo‘lishiga va har xil turdagi ishlab
chiqarish jarayonlarini bajarishga mo‘ljallangan, yopiq hajmni tashkil etuvchi tayanch, to‘sma yoki
har ikkala maqsadga xizmat qiluvchi konstruksiyalardan iborat qurilish tizimi;
inshoot — har xil turdagi ishlab chiqarish jarayonlarini bajarishga,
materiallar, buyumlar,
asbob-uskunalarni
saqlashga, odamlarning vaqtincha bo‘lishiga, odamlar, yuklar va boshqa
narsalarni olib o‘tishga mo‘ljallangan, tayanch, to‘sma yoki har ikkala
maqsadga xizmat qiluvchi
konstruksiyalardan iborat hajmiy, yassi yoki chiziq tarzidagi qurilish tizimi;
bino va inshoot fasadining eskiz loyihasi — bino va inshoot fasadiga o‘zgartirishlar
kiritilmasdan oldin uning old va yon fasadlarining rangli tasvirdagi fotosuratlari bilan birga bino va
inshoot fasadiga kiritilgan o‘zgartirishlarning yakuniy natijasi to‘g‘risida to‘liq tasavvur beruvchi bino
va inshoot fasadining rangli tasvirdagi arxitekturaviy chizmasi.
3. Ushbu Reglamentning amal qilishi bino va inshootning
hajmi va maydonini
o‘zgartirmasdan turib ko‘cha (ko‘chalar)dan ko‘rinadigan old va yon fasadlar (fasad maydonining 25
foizidan ortiq qismi)dagi arxitekturaviy elementlar (tsokoli, quyoshdan himoyalash elementlari,
parapetlari,
ustunlari, tomi, derazalari, peshayvoni, ayvonlari va shu kabilar)ning rangi,
konfiguratsiyasi va o‘lchamlari o‘zgartirilishiga tatbiq etiladi.
Bino va inshootning tashqi ko‘rinishini o‘zgartirishni kelishish, agar bino va inshoot magistral
ko‘chalar (aholi punktlari doirasidagi), xalqaro, davlat ahamiyatiga ega bo‘lgan avtomobil yo‘llari
bo‘ylab joylashgan hollarda talab etiladi.
Tumanlarning ma’muriy markazi bo‘lmagan posyolkalarda, qishloq aholi punktlari (qishloq va
ovullar)da va aholi punktlari tashqarisida joylashgan bino va inshootlarning tashqi ko‘rinishini
o‘zgartirish uchun kelishish talab etilmaydi.
4. Bino va inshootlarning loyiha eskizini kelishmasdan turib bino va inshoot tashqi ko‘rinishini
o‘zgartirish taqiqlanadi.
5. Bino va inshootning tashqi ko‘rinishini o‘zgartirishni kelishish tartibotini amalga oshirishda:
a) Qoraqalpog‘iston Respublikasi
Qurilish vazirligi, viloyatlar va Toshkent shahar bosh
boshqarmalari (keyingi o‘rinlarda vakolatli organlar deb ataladi) — bino va inshoot fasadining eskiz
loyihasini (bino va inshoot fasadiga o‘zgartirishlar kiritilmasdan oldin uning old va yon fasadlarining
rangli tasvirdagi fotosuratlari bilan birga bino va inshoot fasadiga kiritilgan o‘zgartirishlarning
yakuniy natijalari haqida to‘liq tasavvur beruvchi bino va inshootning old va yon fasadlarining rangli
arxitekturaviy chizmasini) kelishadilar;
b) Qoraqalpog‘iston Respublikasi, viloyatlar va Toshkent shahar yer tuzish va ko‘chmas mulk
kadastri davlat korxonasi filiallari (keyingi o‘rinlarda DK filiallari deb ataladi)
bino va inshoot
devorlarining rejasi, kesimi (mavjud bo‘lsa), fasadi va kadastr pasporti nusxalarini yuboradilar.
6. Davlat xizmatlari markazlari, vakolatli organlar va DK filiallari o‘rtasida axborot almashinuvi
elektron raqamli imzoni (keyingi o‘rinlarda ERI deb ataladi) majburiy tartibda qo‘llash orqali faqat
idoralararo elektron o‘zaro bog‘lanish yordamida amalga oshiriladi.
7. Bino va inshootlarning tashqi ko‘rinishini o‘zgartirishni kelishish ushbu Reglamentga
1-
ilovaga
muvofiq sxema bo‘yicha amalga oshiriladi.