357
Маъруза дарсида маълумотлар қисқа берилади ва ҳавола этилган манбаларда
жуда кўплаб қизиқарли материаллар, синов ва имтихонларни топшириш учун зарур
топшириқлар бўлади. Маърузалар асосан PowerPoint тақдимотлари шаклида бўлади.
Дарсларнинг бир қисми on-line режимида бўлади. Бундай материалларни
талабалар якка тартибда мустақил ёки гуруҳ бўлиб ўзлари ўзлаштиришлари зарур
бўлади. On-line дарслар савол-жавоб тарзида бўлиши мумкин. Ишланган
маълумотлар ўқитувчига файл тарзида юборилади ва ўқитувчи томонидан
баҳоланиб қайтарилади. Муддатидан кечиккан ишларни ўқитувчи қабул
қилмасликка ҳақлидир. Назорат ишлари ўқитувчи назорати остида ҳам ўтказилиши
мумкин. Якуний имтихонлар синфда ўтказилади.
Аралаш таълим мутлақо янги тушунча эмас, у анаънавий таълимнинг мантиқий,
изчил ривожланишидир. Қишлоқ хўжалиги машиналари фанини ўқитишда Blended
learning технологиясидан фойдаланилганда талабалар вақт-вақти билан онлайн
дарс машғулотларида иштирок этишади, махсус дастурий воситаларда ёки онлайн
платформаларда вазифалар топширишади [9]. Мавзу бўйича топшириқлар
индивидуал ва гуруҳий шаклда амалга оширилиши мумкин. Шунингдек,
топшириқларнинг бажарилишини ўқитувчи назорат қила олиши ва маслаҳатлар
бериши мумкин. Ўқитувчининг асосий вазифаси курсни тўғри ташкил этиш ва ўқув
материалларини тақсимлашдан иборат. Ўқитувчи дарс жараёнида қандай
материалларни ўзлаштириш, уйда нимани ўрганиши, қайси топшириқлар
индивидуал ишлаш учун, қайси топшириқлар гуруҳий лойиҳалар бўлиши кераклиги
ҳақида қарор қабул қилиши керак. Юзма-юз дарсларда талабалар лойиҳа ишларини
ҳимоя қилишлари, тақдимотларини намойиш қилишлари ва талабалар ҳамда
ўқитувчи ўртасида баҳс-мунозаралар ташкил этишлари, онлайн шаклида эса
лойиҳалар, ижодий ва амалий вазифалар, назорат тестларини ташкил этишлари
мумкин.
