III. Taqqoslashga doir topshiriqlar

Bunday turdagi ijodiy topshiriqlar boshlang’ich sinf matematika darsliklarida ancha ko’p uchraydi. Bunday topshiriqlarni tuzilishi va mazmuniga ko’ra quyidagicha turlarga ajratish mumkin:

1. Tenglik, tengsizlikning to’g’ri bo’lishi uchun sonlarni to’g’ri topishga doir topshiriqlar

2. Tenglik, tengsizlikning to’g’ri bo’lishi uchun amal ishoralarini to’g’ri topishga doir topshiriqlar

3. Tenglik, tengsizlikning to’g’ri bo’lishi uchun qavslarni to’g’ri qo’yishga doir topshiriqlar

4. Son, ifodalarni taqqoslashga doir topshiriqlar

5. Tenglik, tengsizlikning to’g’ri bo’lishi uchun sonlar, amal ishoralari, qavslarni to’g’ri tanlashga doir topshiriqlar

Boshlang’ich sinf o’quvchisi «darchali» misol-topshiriqlarni bajarar ekan, «darcha» o’rniga son yoki amal ishoralarini ongli tanlab qo’yib, topshiriqning yechimini izlaydi. Bunday topshiriqlar ham o’quvchi tafakkurining o’sishiga katta yordam beradi. Chunki o’quvchi zarur son yoki amalni o’ylab, fikrlab, tenglik yoki tengsizlikka qo’yib, tegishli xulosa chiqaradi. Bu bilan o’quvchi mantiqiy tafakkurni ishga soladi. Shu jihatdan ko’pchilik o’quvchilar bunday topshiriqlarni qiziqish bilan bajaradilar.