165
2. Ҳалоллик, бизнес этикаси тамойилларига амал қилиш (integrity).
Кенгаш
компанияни ҳалол ва этика тамойилларига риоя қилган ҳолда фаолият юритишга
йўналтириши керак. Кенгашнинг ўзи самарали бўлиши учун эса кенгаш ичида ва ташқарисида
этика тамойиллари амал қилиши борасида қайғуриши зарур. Бундан ташқари, ҳозирги кунда
кенгашларда ҳалоллик ва этика тамойилларига амал қилинишини таъминлаш учун
директорлар кенгаши жинс нуқтаи-назаридан диверсификациялашган, яъни унда аёл
директорларнинг улуши салмоқли бўлишига ҳам аҳамият берилмоқда. Бироқ аёл
директорларнинг кенгашдаги салмоғи ортишининг компания фаолияти самарасига (аксарият
тадқиқотларда самара компания активлари рентабеллиги – ROA орқали баҳоланган) таъсири
борасида ягона хулосага келинмаган. Бошқача айтганда, бу борада тадқиқотчиларнинг
хулосаларини иккига ажратиш мумкин: аёл директорлар ва компания фаолияти самараси
ўртасида ижобий боғлиқлик мавжуд. Ушбу икки кўрсаткичлар ўртасида сезиларли боғлиқлик
мавжуд эмас. Германия Корпоратив бошқарув кодексининг 5.4.1-бандига мувофиқ, кўмир,
темир ва пўлат саноатини тартибга солувчи қонунчилик ҳужжати (the Co-determination Act for
the Coal, Iron and Steel Industry (Montan-Mitbestimmungsgesetz)) билан тартибга солинадиган,
листингга киритилган компанияларда кузатув кенгашлари таркибида бир жинс вакилларининг
улуши камида 30 % бўлиши керак (масалан: 30 % аёллар + 70 % эркаклар ёки 30 % эркаклар
+ 70 % аёллар).
