– vena qonining kichik miqdori o‘pka to‘qimasidan o‘pka venalari orqali
yurakning chap bo‘lmachasiga
kelib tushadi;
– tarkibi bo‘yicha ko‘proq venaga mansub bo‘lgan qonning bir qismi pastga
ketadigan aortadan 2 kindik arteriyalari orqali platsentaning kapillyar tarmog‘iga
qaytadi, qolgan qon esa tananing pastki qismini zarur moddalar bilan ta’minlaydi.
Yangi tug‘ilgan chaqaloqda qon aylanishining o‘ziga xos xususiyatlari:
Chaqaloq tug‘ilganidan keyin o‘pka orqali gaz almashinuviga o‘tish jarayoni
amalga oshadi. Qon aylanishining kichik
doirasi ishlay boshlaydi, aortada bosim
keskin ortadi. Qon aylanishining kichik va katta doirasidagi o‘zgarishlar o‘ng va
chap shuntlari (oval shaklidagi teshik va arterial yo‘lak) yopilishiga olib keladi.
Arterial yo‘lakning obliteratsiyasi 6–8 haftada yakunlanadi. Postembrional hayotda
kindik venasi dumaloq bog‘lamga, kindik arteriyalari esa pufak-kindik bog‘lamiga
aylanadi. Shakllanayotgan yo‘laklarning to‘liq va barqaror obliteratsiyasi chaqaloq
tug‘ilgandan keyin 6–8, ba’zan 9–11 haftadan keyin yakunlanadi. Oval shaklidagi
teshik chaqaloq hayotining 5–7-oyidagina butunlay yopilib ketadi.
