147
Ma’selen: «Ta’biyiy geografiya» baslang’ısh kursında “Plan h’a’m karta” temasın
o’tilgende geodezist h’a’m topograflar ka’sibi h’aqqında, litosferanı u’yreniwde
geologlar h’aqqında, gidrosferanı u’yreniwde gidrolog ka’sibi ekonomikalıq geografiya
sabaqlarında ekonomist h’a’m basqa ka’sipler h’aqqında bilimler h’a’m mag’lıwmatlar
beriledi. Bunnan basqa h’a’r bir materikti tekseriliw ta’rtibin u’yrengende sayaxatshılar
h’a’m alımlar h’aqqında da mag’lıwmatlar beriledi.
Oqıtıw metodların tan’law.
Oqıtıw metodların tan’law sabaqtın’ du’zilisi
menen tikkeley baylanıslı. Ha’r bir sabaq du’zilisi ushın o’z aldına metod tan’lanadı.
Oqıtıw metodları degende oqıtıwshı h’a’m oqıwshı ta’lim maqsetlerine erisiwdegi
birgeliktegi h’a’m baylanıstag’ı iskerligi tusiniledi. Sabaqtın’ mazmunına qaray
tan’lang’an oqıtıw metodlarına qoyılatug’ın tiykarg’ı talaplardın’ biri oqıwshılardın’
biliw iskerligin ta’miyinlew. Tan’lang’an oqıtıw metodı klasstag’ı barlıq oqıwshılardın’
biliw iskerligin arttırıw, geografiyalıq bilim h’a’m ko’nlikpelerin ku’sheytiriwi lazım.
Sonın’ menen birge oqıwshılardın’ aktiv biliw iskerligi geografiyalıq bilim
dereklerinen paydalanıw ko’nlikpeleri qa’liplestirilgen de g’ana ta’miyinlenedi.
Ma’selen: kartalar, sabaqlıq, sızılmalar h’a’m t.b.
Geografiya sabaqlarında predmetler-ara baylanıslardı anıqlaw.
Geografiya
pa’ni ta’biyiy h’a’m ekonomikalıq pa’nler dizimine kirip qatar panler menen tıg’ız
baylanısqan. Geografiya predmetinin’ o’zine ta’n ta’limli h’a’m ta’rbiyalıq wazıypası
qorshag’an ortalıq, xojalıq h’a’m ekonomikalıq tarawlar boyınsha h’a’r tu’rli bilimlerdi
ulıwmalastırıwg’a imkan beredi. Geografiya sabaqlarında tariyx, biologiya, ximiya,
fizika, matematika pa’nleri menen baylanıslardı anıqlaw h’a’m tiykarlap beriw
oqıwshılardın’ do’retiwshiligin jedellestiredi.
