Mavzu: Guruh murabbiylari faoliyatini tashkil etishda ta’lim texnologiyalaridan foydalanishning samarali yo‘llari

PT tamoyillari. Asosiy tamoyil – PTning O‘zbekiston Respublikasida ta’limning uchta turi – umumiy o‘rta, o‘rta maxsus, kasb-hunar va oliy ta’lim uchun yaratilgan va amaliyotga joriy etilayotgan davlat ta’lim standartlari hamda ta’limning boshqa turlari uchun tegishli davlat dasturlari va talablarini bajarishga yo‘g‘rilganligidir. PT tamoyillarining manbalari ijtimoiy-ma’naviy o‘zgarishlar, yangi pedagogik-psixologik evrilishlar, pedagogika-psixologiya va barcha turdagi fanlarning integrativ va differensiativ rivojlanishi, dunyo pedagogikasi va milliy (mahalliy) pedagogikaning boy va ilg‘or tajribasi, etnopedagogika (xalq pedagogikasi)ning tarixiy va zamonaviy merosidan kelib chiqadi. Pirovard natijada, PT pedagogikaning asosiy («oltin») qoidasini bajarishga, ya’ni ta’lim va tarbiyaning birligini ta’minlashga xizmat qilishi lozim. Bunda izchillik, maqsadlilik, umumiylik kabi tamoyillar bilan bir qatorda PTning ijtimoiy, falsafiy, metodologik, didaktik, pedagogik, psixologik, fiziologik, gigiyenik, mafkuraviy, huquqiy-me’yoriy, iqtisodiy, tarixiy, nazariy va amaliy asoslari ham baravariga qatnashadi. O‘qituvchi va o‘quvchining munosabatiga daxldor tamoyillarning amal qilishi esa o‘quv jarayonining sifat va samaradorligini ta’minlashning qudratli omilidir.