8
KIRISH
O‘zbekiston Respublikasi Prezidenti Shavkat Mirziyoyevning 2020 yil 1 oktabr O‘qituvchi
va murabbiylar kuniga bag‘ishlangan tantanali marosimda
hurmatli muallim va o‘qituvchi, qadrli
tarbiyachi, jonkuyar ziyoli professor-o‘qituvchilarni kasb bayrami bilan qutlab, yo‘llagan
murojaatida “millatni buyuk qiladigan kuch ham bu – ilm-fan, ta’lim va tarbiyadir”, - deb
ta’kidladi.
Shuningdek, “Biz keng ko‘lamli demokratik o‘zgarishlar, jumladan, ta’lim islohotlari
orqali O‘zbekistonda yangi Uyg‘onish davri, ya’ni Uchinchi Renessans poydevorini yaratishni
o‘zimizga asosiy maqsad qilib belgiladik. Bu haqda gapirar ekanmiz, avvalo, uchinchi
Renessansning mazmun-mohiyatini har birimiz, butun jamiyatimiz chuqur anglab olishi kerak”, -
degan murojaati har bir professor-o‘qituvchi, izlanuvchi va tadqiqotchi, bo‘lg‘usi yosh olimlar-
magistr-talabalarning ijod qilishiga, innovatsion tadqiqotlar yaratishiga turtki bo‘ladi.
Haqiqatdan ham, O‘rta Osiyo tarixiga nazar soladigan bo‘lsak, yurtimiz, Vatanimiz azaldan
yuksak tadqiqotlar, sivilizatsiya va madaniyat o‘chog‘i bo‘lgan. Ajdodlarimiz, Buyuk mutafakkir-
olimlarimiz Muhammad Xorazmiy, Ahmad Farg‘oniy, Abu Rayhon Beruniy, Abu Ali ibn Sino,
Mahmud Zamahshariy singari o‘nlab buyuk allomalarimizning jahonshumul ilmiy-ijodiy
kashfiyotlari, Sohibqiron Amir Temur bobomiz, Qozizoda Rumiy, Mirzo Ulug‘bek, G‘iyosiddin
Koshiy, Ali Qushchi singari benazir olimlar, Lutfiy, Sakkokiy, Hofiz Xorazmiy, Abdurahmon
Jomiy, Alisher Navoiy, Bobur Mirzo kabi mumtoz shoir va mutafakkirlar, Sharafiddin Ali Yazdiy,
Mirxond, Xondamir kabi tarixchilar, Mahmud Muzahhib, Kamoliddin Behzod singari
musavvirlar, ko‘plab xattot va sozandalar, musiqashunos va me’morlarning bebaho me’moriy
obidalari, nodir qo‘lyozma va asarlari tariximizning uch ming yillik teran ildizi mavjudligidan
hamda bizning tomirimizda ana shunday buyuk ajdodlarimizning qoni oqayotganidan dalolat
beradi.
Shunday ekan, yosh ijodkor, o‘qituvchi-ustoz, professor-o‘qituvchi, talaba-magistr,
tadqiqotchi va izlanuvchilar Buyuk ajdodlarimizning betakror va noyob ilmiy-ma’naviy merosini
o‘rganib, ularning o‘lmas merosidan kuch-quvvat va ilhom olib o‘zlarining ilmiy sohada yaratgan
tadqiqotlari natijasi, qolaversa pedagogik tajribalaridagi ijodiy ishlari, yaratgan innovatsion
g‘oyalarini ommalashtirish maqsadida ushbu
“ZAMONAVIY FAN VA TALIM-TARBIYA:
MUAMMO, YECHIM, NATIJA” ilmiy-amaliy, onlayn konferensiyasini tashkil etdik.
Zero O‘zbekiston Respublikasi Prezidenti Sh.Miziyoyev aytganlaridek: -“Agar intilsak,
astoydil harakat qilsak, har qanday baland marrani egallash qo‘limizdan keladi. Biz ma’rifat
borasida, ta’bir joiz bo‘lsa, “iligi to‘q” xalqmiz. Ilm-fanga intilish bizning qonimizda, bugungi til
bilan aytganda, genimizda bor”.
