Atrof-muhit holati to‘g‘risida milliy ma’ruza: O‘zbekiston 6.3.3 Javob choralari

Download 2,81 Mb. Pdf ko'rish
bet	78/107
Sana	16.06.2024
Hajmi	2,81 Mb.
	#264081

1 ... 74 75 76 77 78 79 80 81 ... 107

Bog'liq
uzbekistan-state-of-the-environment-uz

75
Atrof-muhit holati to‘g‘risida milliy ma’ruza: O‘zbekiston
6.3.3 Javob choralari
O‘zbekistonda chiqindilar «Chiqindilar to‘g‘risida»gi qonun (05.04.2002-yildagi 362–II-son)
bilan tartibga solinadi. Ushbu qonunning maqsadi chiqindi bilan bog‘liq ishlarni amalga oshirish
sohasidagi munosabatlarni tartibga solish, asosiy vazifalari chiqindilarning fuqarolar hayoti va
sog‘lig‘i, atrof-muhitga zararli ta’sirining oldini olish, chiqindilar hosil bo‘lishini kamaytirish va
ulardan xo‘jalik faoliyatida oqilona foydalanilishini ta’minlashdan iborat. Vazirlar Mahkamasining
«Chiqindilar bilan bog‘liq ishlarni amalga oshirish sohasida davlat hisobi va nazoratini olib
borish tartibi to‘g‘risidagi nizomni tasdiqlash haqida»gi (2014-yil 27-oktabrdagi 295-son) qarori
mamlakat uchun muhim bo‘lgan yana bir qonunchilik hujjati bo‘lib, u mamlakatdagi chiqindilar
borasidagi ma’lumotlarni taqdim etish tartibini belgilab beradi. Chiqindilarga oid ma’lumotlar
«Tabiatni muhofaza qilish, tabiiy resurslardan oqilona foydalanish, o‘rmon va ovchilikning asosiy
ko‘rsatkichlari» nashrida e’lon qilinadi. Chiqindilar va siniq parchalari to‘g‘risidagi ma’lumotlar
davlat statistika hisobotining sohaga oid shakllariga muvofiq shakllantiriladi.
2017-yildan buyon O‘zbekistonda chiqindilarni boshqarish tizimida sezilarli ijobiy o‘zgarishlar
amalga oshirildi. O‘zbekiston Respublikasi Prezidenti va Vazirlar Mahkamasining bir qator qaror va
farmoyishlari (2017-yil 21-apreldagi «2017–2021-yillarda maishiy chiqindilar bilan bog‘liq ishlarni
amalga oshirish tizimini tubdan takomillashtirish va rivojlantirish chora-tadbirlari to‘g‘risida» PQ–
2916-sonli, 2018-yil 18-maydagi «Maishiy chiqindilar bilan bog‘liq ishlarni amalga oshirish tizimini
yanada takomillashtirish chora-tadbirlari to‘g‘risida»gi PQ–3730-sonli, 2020-yil 29-sentabrdagi
«Maishiy va qurilish chiqindilari bilan bog‘liq ishlarni boshqarish tizimini yanada takomillashtirish
chora-tadbirlari to‘g‘risida»gi PQ–4846-sonli qarorlari) qabul qilindi. Umuman, chiqindilar
bilan bog‘liq masalalarni tartibga solish maqsadida O‘zbekiston Respublikasi Prezidentining 7
ta farmoni, 6 ta qaror, 1 ta farmoyishi, O‘zbekiston Respublikasi Vazirlar Mahkamasining 21 ta
qarori va 5 ta idoraviy normativ-huquqiy hujjatlar qabul qilindi. Ulardan 2019–2028-yillar davrida
O‘zbekiston Respublikasida qattiq maishiy chiqindilar bilan bog‘liq ishlarni amalga oshirish
strategiyasi qattiq maishiy chiqindilarni boshqarishning samarali tizimini yaratishga qaratilgan.
Strategiya O‘zbekiston Respublikasi Prezidentining 2019-yil 17-apreldagi PQ–4291-sonli qarori
bilan tasdiqlangan. Strategiyaning maqsadi qattiq maishiy chiqindilarning atrof-muhitga salbiy
ta’sirini kamaytirish va minimallashtirishdir. Yangi strategiya chiqindilarni boshqarishning samarali
tizimini yaratishga qaratilgan bo‘lib, investorlarga chiqindilarni boshqarish bo‘yicha turli loyihalarni
amalga oshirish imkonini beradi.
Maishiy chiqindilarni boshqarish tizimi infratuzilmasini takomillashtirish, umumiy quvvati yiliga
1 mln. tonnadan ortiq bo‘lgan maishiy chiqindilarni kompleks boshqarishda klasterlarni yaratish
bo‘yicha salmoqli ishlar amalga oshirildi. Chiqindilarni boshqarish sohasida davlat-xususiy
sheriklik loyihalari kengaytirildi. O‘zbekiston Respublikasi Tabiiy resurslar vazirligi va Janubiy
Koreya Atrof-muhit sanoati va texnologiyalari instituti o‘rtasidagi kelishuv doirasida 6,6 mln.
dollarga teng ekologik loyihalarni amalga oshirish boshlandi. 2023-yil mart oyida YuNICEF
Qoraqalpog‘iston Respublikasi Sog‘liqni saqlash vazirligiga tibbiyot chiqindilarini utilizatsiya qilish
obyektlarini topshirdi. Surxondaryo va Sirdaryo viloyatlarida tibbiyot chiqindilarini utilizatsiya
qilish punktlari foydalanish uchun tayyorlanmoqda. Dastur Vaksinalar Alyansi (Gavi) va YuNICEF
tomonidan moliyalashtirilmoqda.
O‘zbekistonda 2024-yil 1-yanvardan boshlab qalinligi 100 mikrondan kam bo‘lgan polimer
qadoqlarni ishlab chiqarish va sotishga taqiq joriy etiladi. Bu qishloq xo‘jaligi mahsulotlari uchun

76
Atrof-muhit holati to‘g‘risida milliy ma’ruza: O‘zbekiston
plastik rulonli va biologik parchalanadigan qoplarga taalluqli emas. O‘zbek mutaxassislari nufuzli
Britaniya-Kanada WELLS laboratoriyasi va London Qirolicha Mariya universiteti tomonidan
sertifikatlangan biologik parchalanadigan maishiy paketlarni ishlab chiqarish texnologiyasini
yaratdilar. O‘tgan yillar davomida Toshkent shahrida chiqindilarni (qog‘oz, plastmassa va
boshqalar) alohida yig‘ish uchun 3 xil rangdagi 720 ta maxsus konteyner o‘rnatildi.
O‘zbekistonda qattiq maishiy chiqindilarni boshqarish sohasida «Nol chiqindi» (Zero waste)
tamoyillariga asoslangan yangi tartib va mexanizmlar joriy etiladi. 2023-yil 31-maydagi
O‘zbekiston Respublikasi Prezidentining «Ekologiya va atrof-muhitni muhofaza qilish sohasini
transformatsiya qilish va vakolatli davlat organi faoliyatini tashkil etish chora-tadbirlari to‘g‘risida»
PF–81-sonli Farmonida chiqindilarni maishiy chiqindi turlariga qarab, alohida-alohida to‘plash
va olib chiqib ketish nazarda tutilgan. Maishiy chiqindilarning turlariga qarab aylanma iqtisodiyot
amaliyotini joriy etish rejalashtirilgan: yangidan hosil bo‘layotgan chiqindilarni poligonlarga
joylashtirmasdan, maksimal darajada qayta ishlanishi yoki kuydirilishi kerak. Shu nuqtayi nazardan,
poligonlardagi chiqindilarning bosqichma-bosqich to‘liq qayta ishlanishi va kuydirilishiga erishish
rejalashtirilmoqda.

Download 2,81 Mb.

1 ... 74 75 76 77 78 79 80 81 ... 107

Download 2,81 Mb.

Pdf ko'rish