Pnevmogidravlik tormoz yuritmasi pnevmatik va gidravlik qismlardan
tashkil topgan bo‘lib, avtomobilning oldingi, oraliq va orqa ko‘priklari g‘ildirak
tormozlarining kalodkalari g‘ildirak gidrotsilindrlari
yordamida harakatga
keltiriladi. Bunda oldingi va oraliq ko‘priklarning g‘ildirak gidrotsilindrlari
o‘tkazuvchi trubalar orqali bosh tormoz silindri bilan, orqa ko‘prik g‘ildiraklari
esa bosh tormozlovchi silindr bilan bog‘langan bo‘ladi.
Shunday qilib, aralash
yuritmaning gidravlik qismi ikkita mustaqil ishlovchi gidroyuritmalardan iborat
bo‘ladi.
Yuritmaning pnevmatik qismi porshen ko‘rinishidagi
aralash tormoz
kranidan va tormoz kranining quyi seksiyasi bilan o‘tkazuvchi trubalar orqali
bog‘langan ikkita pnevmotsilindrlardan tashkil topgan.
Tormoz kranining
yuqori seksiyasidan o‘tkazuvchi trubalar orqali avtomobil tirkamasining tormoz
yuritmasi ishga tushiriladi. Yuritmaning pnevmatik qismi resiver bilan
bog‘langan kompressordan uzatilayotgan siquvchi havo bilan ishlaydi.
Aralash tormoz yuritmasining gidravlik
qismi avtomobilning barcha
g‘ildiraklarining bir vaqtda tormozlanishini ta’minlaydi, pnevmatik qismi esa
boshqarishni yengillashtirib, tormoz kuchini avtomobil tirkamasiga ham uzatadi.
