Mineral moddalarning umumiy miqdori tana massasining 3-5% ni tashkil qiladi. Ularning oziq-ovqat mahsulotlaridagi miqdori uncha katta emas va 0,03-1,9% ga teng

Quyida ayrim makro- va mikroeelemetlarning inson organizmi uchun fiziologik ahamiyatining qisqacha tavsifi keltirilgan.

Makroelementlar

Kalsiy (Ca). Sutkalik ehtiyoj – 800-150 mg.

Suyak to‘qimalari va tishlarning asosiy elementi bo‘lib, bu erda kalsiy fosfat bilan erimaydigan kristall mineral – kalsiy gidroksilapatit hosil qiladi. Katta yoshdagi kishi organizmida kalsiyning umumiy miqdori 1,5 kg gacha etadi. Yiliga inson organizmidagi 20% kalsiy almashinib turadi. Skelet suyaklaridan kuniga 700-800 mg kalsiy chiqib ketadi va qaytib kiradi.

Kalsiy antistress, antiallergik, antioksidant ta’sirlariga ega. Tishlar, suyaklar, tirnoqlarning me’yordagi strukturasini; yurakning me’yordagi ritmini ta’minlaydi; asabtizimining faoliyatini yashilaydi; temirning o‘zlashtirilishiga yordam beradi; hujayralarning saraton oldi holatidan saraton holatiga o‘tishining oldini oladi. Organizmda kalsiy miqdorining etarli bo‘lishi suyak to‘qimasida qo‘rg‘oshin to‘planishini oldini oladi. Organizmga kalsiy etishmovchiligi yuzaga kelganda yoki uning metabolizmi buzilganida suyak to‘qimasida (masalan, bu elementning suyaklardagi miqdori kamayishini tavsiflovchi osteoporoz yuzaga kelib, suyaklar mo‘rtlashuviga va sinishiga olib keladi), mushaklarda (og‘riqlar, titrashlar), qalqonsimon bezda (funksiyasining buzilishi), immun tizimida (allergiyaga moyillik, immunitetning pasayishi, jumladan o‘simtalarga qarshi kurashning pasayishi), qon hosil qilish tizimida (ivishning buzilishi) o‘zgarishlar yuzaga keladi. Kalsiy tanqisligi gipertonik inqirozlar, homiladorlikdagi toksikozlar, giperxolesterin yuzaga kelishiga sabab bo‘lishi mumkin.